Qaraqalpaqstan Respublikası Joqarǵı Keńesiniń Baslıǵı Amanbay Orınbaev YuNESKOnıń Ózbekstandaǵı turaqlı wákili Sara Noshadi menen ushırastı
1576
Onda Qaraqalpaqstan Respublikası Joqarǵı Keńesi Baslıǵınıń orınbasarı R.Saparbaev qatnastı.
Ushırasıwda dáslep Joqarǵı Keńes Baslıǵı búgingi kúnde elimizde turizm hám mádeniyat tarawın rawajlandırıw, bul baǵdarda alıp barılıp atırǵan jumıslar, húrmetli Prezidentimiz tárepinen tarawdı rawajlandırıw baǵdarında qabıl etilip atırǵan párman hám qararlar haqqında keń túrde atap ótti.
Sonıń menen birge, mádeniy miyras obektlerine itibardı kúsheytiw, olardı qorǵaw hám saqlaw, ótmishten saza beriwshi tariyxıy estelikler, bir neshe ásirlik mádeniyatımız hám milliyligimizdiń ájayip dúrdanaların qásterlew, olardıń YuNESKO miyrasları qatarına kirgiziliwin támiyinlew, ilim-pán, mádeniyat baǵdarlarında birge islesiwlerdi keńeytiw máseleleri sóz etildi.
Ushırasıwda sonday-aq, qaraqalpaq milliy saz ásbabı esaplanatuǵın Ǵobızdı YuNESKO miyrasları qatarına kirgiziliwindegi jumıslardı jedellestiriw, bunnan tısqarı jáne bir qatar obektlerdi YuNESKO miyrasları qatarına kirgiziw boyınsha da pikirlesildi.
Óz náwbetinde miymanlar jıllı júzlilik penen kútip alǵanı ushın minnetdarshılıǵın bildirdi hám birge islesiwdi ele de keńeytiw, bar bolǵan múmkinshiliklerden nátiyjeli paydalanıw, mádeniy miyras obektlerin qorǵaw hám óz-ara baylanıslardı bekkemlew boyınsha pikirlerin bildirdi.
Ushırasıw juwmaǵında Joqarǵı Keńes Baslıǵı birge islesiwdi ele de keńeytiw baǵdarında respublika basshıları barqulla tayar ekenligi hám hár qanday usınıs qollap-quwatlanatuǵınlıǵın atap ótti.
Qaraqalpaqstan Respublikası Joqarǵı Keńesiniń Málimleme xızmeti