«Muǵallimler hám ustazlar kúni» múnásibeti menen bayram saltanatı bolıp ótti

Búgin Berdaq atındaǵı Qaraqalpaq mámleketlik akademiyalıq muzıkalı teatrında «1-oktyabr - Muǵallimler hám ustazlar kúni» múnásibeti menen bayram saltanatı bolıp ótti. Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev jıynalǵanlardı kásiplik bayramı menen qutlıqladı hám Ózbekstan Respublikasınıń Prezidenti Sh.Mirziyoevtiń Ózbekstan muǵallimleri hám ustazlarına jollaǵan bayram qutlıqlawın oqıp esittirdi. Atap ótilgeninley, sońǵı jılları húrmetli Prezidentimizdiń basshılıǵındaǵı reformalar nátiyjesinde mektepke shekemgi bilimlendiriwge qamtıp alıw dárejesi 27 procentten 72 procentke, joqarı bilimlendiriwde bolsa 9 procentten 42 procentke, joqarı oqıw orınlarınıń sanın 77 den 212 ge jetkeriwge erisildi.

Usı iygilikli jumıslardıń dawamı sıpatında sońǵı bes jıl ishinde Qaraqalpaqstanda da mektepke shekemgi bilimlendiriw shólkemleriniń sanı 318 den 1654 ke, balalardı baqshalarǵa qamtıp alıw dárejesi 27,6 procentten 80 procentke jetkerildi, mekteplerdiń sanı 706 dan 722 ge, joqarı oqıw orınlarınıń sanı 6 dan 12 ge kѳbeydi. Mektep pitkeriwshileriniń joqarı oqıw orınlarına kiriw kórsetkishi 14,2 procentten 41,8 procentke ѳsti. Qábiletli jaslarımızdı oqıtıw sistemasın jáne de jetilistiriw maqsetinde qala hám rayonlarımızda 18 qánigelestirilgen mektep hám mektep-internatları ashıldı. Barlıq bilim hám tárbiya máskanlarınıń materiallıq-texnikalıq bazası bekkemlenip atır.

Sonıń menen birge Joqarǵı Keńes Baslıǵı Prezidentimizdiń ayrıqsha itibarı hám ǵamxorlıǵı menen bıyılǵı oqıw jılında jámi 9 mıń 500 jaslarımız qosımsha kvotalar tiykarında student bolıw baxtına miyasar bolǵan bolsa, sonıń ishinde 113,5 balldan joqarı ball toplaǵan 3 mıń jaslarımız mámleketlik grant tiykarında oqıwǵa qabıl etilgenligin de ayrıqsha tilge aldı. Bunnan soń, húrmetli Prezidentimiz tárepinen sıylıqlanǵanlarǵa «Dwstlik» ordeni, II dárejeli «Soǵlom avlod uchun» ordeni, «Soǵlom turmush» medalı, «Shuhrat» medalı, Qaraqalpaqstan Respublikası Joqarǵı Keńesi Prezidiumı qararı menen «Qaraqalpaqstan Respublikasına miyneti sińgen xalıq bilimlendiriw xızmetkeri», «Qaraqalpaqstan Respublikasına miyneti sińgen jaslar ustazı» húrmetli ataqları, «Ardaqlı nuranıy», «Watan pidayısı», «Ibratlı hayal» kѳkirek belgileri, bunnan tısqarı, Ózbekstan Respublikası Mektepke shekemgi hám mektep bilimlendiriwi ministrligi tárepinen «Wzbekiston Respublikasi Xalq talimi alochisi», «Xalq talimi fidoyisi» kókirek belgileri menen, Joqarı bilimlendiriw, ilim hám innovaciyalar ministrligi tárepinen «Oliy talim alochisi», «Wrta maxsus va professonal talim alochisi» kókirek belgileri óz iyelerine saltanatlı túrde tapsırıldı

Bayram saltanatı kórkem óner hám mádeniyat xızmetkerleri atqarıwındaǵı koncert baǵdarlaması menen dawam etti.

Qaraqalpaqstan Respublikası Joqarǵı Keńesiniń Málimleme xızmeti