Xalıqqa sociallıq xızmetler hám járdemler kórsetiw sistemasın jáne de jetilistiriw ilajları haqqında

Ózbekstan Respublikası Prezidentiniń qararı

Sociallıq qorǵawdı máhálle dárejesinde shólkemlestiriw, sociallıq xızmet hám járdemlerdi kompleksli qatnas tiykarında kórsetiw, xalıqtıń awır sociallıq jaǵdayǵa túsip qalıwınıń aldın alıw, sonday-aq, sociallıq qorǵawdıń mánzilliligi hám nátiyjeliligin arttırıw sonday-aq, xalıqtıń járdemge mútáj qatlamınıń sociallasıwın támiyinlew maqsetinde: 2023-jıl 15-oktyabrden baslap 1-qosımshaǵa muwapıq dáslep 28 rayon (qala)larda eksperiment túrinde Ózbekstan Respublikası Prezidenti janındaǵı Sociallıq qorǵaw milliy agentliginiń (keyingi orınlarda – Agentlik) «Insan» sociallıq xızmetler orayları hám sociallıq xızmetkerler toparları kórsetetuǵın sociallıq xızmetler hám járdemlerdiń jańa sisteması jolǵa qoyılsın. Tómendegiler rayon (qala)lardaǵı «Insan» sociallıq xızmetler oraylarındaǵı sociallıq xızmetkerler toparları (keyingi orınlarda – sociallıq xızmetker)nıń tiykarǵı wazıypaları hám jumıs baǵdarları etip belgilensin: awır jaǵdayǵa túsip qalǵan hám awır jaǵdayǵa túsip qalıw qáwpi joqarı bolǵan shaxslar hám shańaraqlarǵa (keyingi orınlarda – sociallıq qorǵawǵa mútáj xalıq) tikkeley máhálle dárejesinde kompleksli qatnas tiykarında professional sociallıq xızmetler kórsetiw; sociallıq qorǵawǵa mútáj xalıqtıń talapları hám imkaniyatların bahalaw arqalı olarǵa individual tártipte sociallıq xızmetler hám járdemler kórsetiw rejelerin (keyingi orınlarda – individual sociallıq xızmetler rejesi) islep shıǵıw; individual sociallıq xızmetler rejesine muwapıq sociallıq xızmetler hám járdemlerdiń kórsetiliwin shólkemlestiriw, sonday-aq, zárúr jaǵdaylarda individual sociallıq xızmetler rejesine tiyisli dúzetiwler kirgizip barıw; ishki resurslardı, sonıń ishinde, sociallıq qollap-quwatlaw boyınsha kewillilerdi (tuwısqanlar, qońsı-qobalar, volontyorlar) sociallıq xızmet hám járdemler kórsetiwge tartıw hám olardıń usı tarawdaǵı jumısın muwapıqlastırıw; xalıqqa mámleket tárepinen kepillengen sociallıq xızmetler hám járdemler haqqında, sonday-aq, xalıqtıń usı xızmetlerdi alıwǵa bolǵan huqıqları boyınsha túsinik beriw. Onda, mámleketlik uyımlar hám shólkemlerdiń basshıları sociallıq xızmetler hám járdemler kórsetiwde sociallıq xızmetlerge hár tárepleme járdem beriw boyınsha jeke juwapker bolıp esaplanadı. 2023-jıl 15-oktyabrden baslap talabanlardı basqalardıń kútimine mútáj bolǵan jalǵız jasawshı yamasa jalǵız kekse hám mayıplıǵı bolǵan shaxs dep tán alıw yamasa biykarlaw, sonday-aq, jalǵız kekseler hám mayıplıǵı bolǵan shaxslar dizimine kirgiziw (onnan shıǵarıw) «Insan» sociallıq xızmetler oraylarınıń qararına tiykarlanıp ámelge asırılatuǵını; «Insan» sociallıq xızmetler orayları direktorların turaqlı jasaw ornına iye bolmaǵan sociallıq qorǵawǵa mútáj xalıqtı Agentlik janındaǵı turaq jay fondına iye bolǵan mákemelerge altı ay múddetke shekem waqtınsha dizimnen ótkeriw huqıqı beriletuǵını belgilensin. Respublika kóleminde sociallıq xızmetler hám járdemler kórsetiw sistemasın jetilistiriwge baylanıslı ilajlar rejesi 2-qosımshaǵa muwapıq tastıyıqlansın. Ózbekstan Respublikası Bas ministri A.N.Aripov usı qararǵa 1-qosımshada kórsetilgen 28 rayon (qala)larda sociallıq xızmetler hám járdemler kórsetiliwiniń jańa sistemasın jolǵa qoyıw procesinde payda bolatuǵın sistemalı mashqalalardı saplastırıw ilajların kórip barsın. Eksperiment dáwirinde rayon (qala) hákimlikleri «Insan» sociallıq xızmetler oraylarında xalıqqa sociallıq xızmetler hám járdemlerli kórsetiw sistemasın shólkemlestiriw boyınsha «jol kartaları»n tastıyıqlaytuǵını atap ótilsin. Ózbekstan Respublikası Prezidentiniń keńesgóyi – Agentlik direktorı M.P.Olloyorov eki ay múddette eksperiment nátiyjesi boyınsha sociallıq xızmetler hám járdemler sistemasın barlıq aymaqlarda engiziw boyınsha usınıs kirgizsin. Ornatılsın: Agentlik hám onıń aymaqlıq bólimleri zorlıqqa ushıraǵan hayal-qızlar hám balalar menen islesiw boyınsha wákillikli uyım bolıp esaplanadı; sociallıq xızmetkerler jumısınıń nátiyjeliligin bahalaw normaları ornatılǵan tártipte Agentlik tárepinen tastıyıqlanadı; sociallıq xızmetkerler jumısınıń nátiyjeliligin bahalaw nátiyjeleri boyınsha tólenetuǵın sıylıqlar Sociallıq qorǵaw mámleketlik qorınıń qarjıları esabınan qarjılandırıladı; Sociallıq inspekciya hám onıń aymaqlıq basqarmalarına Agentlik tárepinen jumısı muwapıqlastırılatuǵın ministrlik hám uyımlar sonday-aq, olardıń sistemasındaǵı shólkemlerge olardıń sociallıq xızmet hám járdemlerdi nızamshılıqta belgilengen tártipte kórsetpegen (yamasa tolıq bolmaǵan kólemde kórsetken) xızmetkerlerine intizamiy ilajların qollanıw haqqında usınıs xatlar kirgiziw wákillikleri beriledi. «Insan» sociallıq xızmetler orayları sonday-aq, sociallıq xızmetkerlerdiń jumısın jolǵa qoyıwǵa baylanıslı mámleketlik satıp alıwlar, burınǵısınan ózgeshe tárizde, tikkeley shártnama dúziw arqalı ámelge asırılatuǵını belgilensin. Ádillik ministrligi: 2023-jıl 1-noyabrge shekem Agentlik penen birgelikte «Sociallıq xızmet aynaları»nıń tiykarǵı jumıs baǵdarların belgilewshi reglament tastıyıqlanıwın; 2023-jıl 1-dekabrge shekem Agentliktiń buyırtpasına tiykarlanıp «Sociallıq xızmet aynaları»nıń tolıq jumıs alıp barıwı ushın zárúr materiallıq-texnikalıq baza, mebel úskeneleri, sonıń ishinde, baylanıs quralları (internet, kommunikaciya hám basqalar) menen; 2024-jıl 1-yanvardan baslap mámleketlik xızmetler orayları hám olardıń filiallarında sociallıq qorǵawǵa mútáj xalıqqa sociallıq xızmetler hám járdemler kórsetiwge qánigelesken «Sociallıq xızmet aynaları»jumısınıń tolıq shólkemlestiriliwin támiyinlesin. Tómendegiler: a) Agentlik 2023-jıl 1-noyabrge shekem: «Birden-bir milliy sociallıq qorǵaw» málimleme sistemasında (keyingi orınlarda – Sociallıq qorǵaw AT) sociallıq xızmetlerdi muwapıqlastırıwshı ayrıqsha elektron modul (e-case) islep shıǵılıwın hám onıń jumıs alıp barıwın; Sanlı texnologiyalar ministrligi menen birgelikte «Insan» sociallıq xızmetler oraylarındaǵı sociallıq xızmetkerler tárepinen puqaralardıń arzaların onlayn qabıllaw tájiriybesi usı qararǵa 1-qosımshada belgilengen 28 rayon (qala)larda eksperiment túrinde ámelge asırılıwın támiyinlesin; b) Sanlı texnologiyalar ministrligi, Agentlik Kámbaǵallıqtı qısqartıw hám bántlik ministrligi, Jaslar siyasatı hám sport ministrligi menen birgelikte 2023-jıl 1-dekabrge shekem Sociallıq qorǵaw ATǵa «Mehir dápteri», «Saqawat hám kómek», «Jaslar dápteri» hám «Hayal-qızlar dápteri» málimleme bazaları, sonıń ishinde, usı dápterlerge kirgizilgen puqaralar sonday-aq, olarǵa tayınlanǵan tólemler haqqında maǵlıwmatlar integraciyasın támiyinlesin. Agentlik: a) 2024-jıl 1-yanvarǵa shekem: Kámbaǵallıqtı qısqartıw hám bántlik ministrligi, Jaslar siyasatı hám sport ministrligi menen birgelikte «máhálle jetiligi» tárepinen birden-bir sorawnama tiykarında máhállede sociallıq qorǵawǵa mútáj xalıqtıń mashqalaların anıqlaw sisteması jolǵa qoyılıwın; awır jaǵdayǵa túsip qalǵan hám awır jaǵdayǵa túsip qalıw qáwpi joqarı bolǵan xalıq kategoriyaların anıqlaw boyınsha usınıslar Húkimetke kirgiziliwin támiyinlesin; b) 2024-jıl 1-martqa shekem mámleket tárepinen sociallıq xızmet hám járdemler kórsetiwde sociallıq xızmetler kórsetiw shártnamasın dúziw ámeliyatın engiziw boyınsha usınıslar Húkimetke kirgiziliwin támiyinlesin. Ózbekstan Respublikası Oliy Majlisi janındaǵı Mámleketlik emes kommerciyalıq emes shólkemlerdi hám puqaralıq jámiyetiniń basqa institutların qollap-quwatlaw jámiyetlik fondına Agentlik buyırtpası tiykarında tiyisli mámleketlik emes kommerciyalıq emes shólkemlerge qarjı ajıratıp barıw usınıs etilsin. Ministrler Kabineti bir hápte múddette: «Insan» sociallıq xızmetler orayları hám máhállelerde sociallıq xızmetkerlerdiń jumısın jolǵa qoyıwǵa baylanıslı processlerdi qamtıp alıwshı tiyisli Húkimet qararın; Sociallıq qorǵaw AT sistemasına integraciyalanatuǵın elektron maǵlıwmatlar bazaları hám uyımlararalıq maǵlıwmatlar almasıwı dizimi tastıyıqlanıwın támiyinlesin. Agentlik ministrlik hám uyımlar menen birgelikte eki ay múddette nızamshılıq hújjetlerine usı qarardan kelip shıǵatuǵın ózgerisler hám qosımshalar haqqında Ministrler Kabinetine usınıslar kirgizsin. Ózbekstan Respublikası Prezidentiniń ayırım qararlarına 3-qosımshaǵa muwapıq ózgerisler kirgizilsin. Usı qarardıń orınlanıwın nátiyjeli shólkemlestiriwge juwapker hám jeke juwapker etip Ózbekstan Respublikası Prezidentiniń keńesgóyi – Agentlik direktorı M.P.Olloyorov belgilensin. Qarardıń orınlanıwın dodalap barıw, juwapker shólkemlerdiń jumısın muwapıqlastırıw hám qadaǵalaw Ózbekstan Respublikasınıń Bas ministri A.N.Aripovqa júklensin. Ózbekstan Respublikası Prezidenti Sh.MIRZIYoEV Tashkent qalası, 2023-jıl 28-sentyabr