Birinshi professional vokal mektebi – «Piyazov akademiyası»nda italiyalı operashılar da sabaq beredi

Tashkenttegi «Temirjolshılar mádeniyat sarayı»nda Ózbekstandaǵı birinshi professional vokal mektebi – «Piyazov akademiyası»nıń ashılıw máresimi bolıp ótti. Máresimde akademiyanıń kórkemlik jaqtan basqarıwshısı, Ózbekstan hám Qaraqalpaqstan xalıq artisti Jeńisbek Piyazov haqqında ulıwma maǵlıwmat berdi. – Negizinde, bul akademiyanı ashıw ideyası eki jıl aldın payda bolǵan edi,-dedi Jeńisbek Piyazov. – Akademiyada úsh baǵdar boyınsha sabaq ótiledi. Birinshisi, klassikalıq baǵdar – opera bolıp esaplanadı. Bul baǵdarda 10 oqıwshı qabıl etiledi. Ekinshisi, estrada hám maqam baǵdarı. Úshinshi baǵdar bolsa baslawshılarǵa mólsherlengen bolıp, sóylegende tez sharshap qalmaw, dawıs texnikası úyretiledi. «Piyazov akademiyası»nda Italiyalı belgili operashılar da sabaq beredi. Sonday-aq, hár jılı bir yamasa eki oqıwshı grant tiykarında Italiyaǵa oqıwǵa jiberiledi. Qalaberdi, 40 adamnan ibarat «Bravo» orkestri de akademiya menen birge islesiwi kútilmekte.