Joqarǵı Keńes Baslıǵı isbilermenler menen ushırasıp, mashqalaların tıńladı
920
Joqarǵı Keńes Baslıǵı isbilermenler menen ushırasıp, mashqalaların tıńladı
Qaraqalpaqstan Respublikası Joqarǵı Keńesiniń Baslıǵı Amanbay Orınbaev biznesti qollap-quwatlaw hám jańa joybarlardı iske túsiriwde ushırasıp atırǵan mashqalalardı anıqlaw boyınsha isbilermenler menen ushırastı.
Onda húrmetli Prezidentimizdiń Qaraqalpaqstan ushın hám Qaraqalpaqstanda isbilermenlikti qollap-quwatlaw ushın qabıl etilgen bir qatar párman hám qararları qabıl etilgenligi, usı tiykarda respublikamız isbilermenleri ushın oǵada úlken múmkinshilikler jaratılǵanlıǵı ayrıqsha tilge alındı.
Búgingi kúnge kelip mámleketlik baǵdarlamalar sheńberinde bir qatar investiciyalıq joybarlar boyınsha mánzilli dizim islep shıǵılǵan bolsa da, tilekke qarsı, ayırım joybarlardıń iske túsiriliwinde bir qatar mashqalalar ushıraspaqta. Bunda jańa joybarlardıń iske túsiriliwi menen baylanıslı ayırım mashqalalar boy kórsetip atır.
Ótkerilgen ushırasıwda isbilermenler tárepinen bir qatar máseleler kóterildi. Bildirilgen múrájatlar tiykarınan biznesti qarjılandırıw hám kredit ajıratıwdaǵı mashqalalar, isbilermenlik jumısın jetilistiriwde ushırasıp atırǵan byurokratiyalıq tosıqlar hám ayırım jónelislerdegi isbilermenlik jumısların qollap-quwatlaw boyınsha bolıp, Joqarǵı Keńes Baslıǵı tárepinen barlıq mashqalalar tıńlandı.
Óz náwbetinde, isbilermenler tárepinen kóterilgen máseleler Joqarǵı Keńes Baslıǵınıń jeke qadaǵalawına alındı hám hár bir jańa jumıs orınların jaratıw niyeti bar isbilermen qollap-quwatlanatuǵınlıǵı atap ótildi.
Ushırasıw sońında wazıypalar belgilep alındı hám tiyisli tapsırmalar berildi.
Qaraqalpaqstan Respublikası Joqarǵı Keńesiniń Málimleme xızmeti