15-oktyabr – «Xalıqaralıq awıl hayalları kúni» múnásibeti menen bayram ilajı ótkerildi

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, sáne múnásibeti menen jıynalǵanlardı qutlıqladı. Aytıp ótiw orınlı, búgingi kúnde elimizde húrmetli Prezidentimizdiń basshılıǵında hayal-qızlardı qollap-quwatlaw máselesi mámleketlik siyasattıń baslı baǵdarlarınan birine aylanǵan. Ótken jıllar dawamında hayal-qızlardıń turmısında oǵada áhmiyetli bolǵan ózgerisler menen jańalanıwlar júz berdi.

  Húrmetli Prezidentimizdiń tikkeley itibarı hám ǵamxorlıǵı menen elimiz hayal-qızların qollap-quwatlaw boyınsha bir qatar nızam, párman hám qararlar qabıl etildi, hayal-qızlarǵa isbilermenlik baǵdarı boyınsha kóplegen jeńillikler berildi, bilimlendiriw, mádeniyat, sport hám basqa-da tarawlardaǵı hayal-qızlarımız materiallıq hám ruwxıy jaqtan qollap-quwatlanıp kelinbekte. Ótken eki jıl dawamında “Hayallar dápteri”ne kirgizilgen 82 mıńnan aslam hayal-qızlardıń mashqalaların sheshiw ushın 158,6 mlrd. sum qarjı ajıratıldı. Bıyılǵı jıldıń ózinde “Hayallar dápteri”ne kirgizilgen 46 mıńnan aslam hayal-qızlardıń mashqalaları óziniń unamlı sheshimin taptı. Sonday-aq, 43 mıńǵa shamalas hayal-qızdıń bántligi támiyinlendi, 4 mıń 825 hayal-qız kásip-ónerge oqıtıldı, isbilermenlik penen shuǵıllanıwshı 21 mıń 750 xayal-qızǵa 367 mlrd. sumlıq kreditler ajıratıldı hámde bunday qollap-quwatlawlar ele dawam etpekte.

  Ótkerilgen ilaj dawamında bir qatar hayal-qızlar Joqarǵı Keńestiń kókirek belgileri hám estelik sawǵaları menen sıylıqlandı. Ilaj kórkem óner hám mádeniyat xızmetkerleri tárepinen tayarlanǵan koncert baǵdarlaması menen dawam etti.  

Qaraqalpaqstan Respublikası Joqarǵı Keńesiniń Málimleme xızmeti