Ózbekstan Prezidenti Qıtaydıń jetekshi “Amer International” kompaniyası baslıǵın qabılladı

Ózbekstan Respublikası Prezidenti Shavkat Mirziyoev 17-oktyabr kúni Pekin qalasına ámeliy saparı sheńberinde ózine ajıratılǵan rezidenciyada “Amer International” industriallıq-sanaat xoldingi baslıǵı Van Venindi qabılladı. Qıtaydıń jetekshi konglomeratlarınan biri bolǵan “Amer International” jetik joqarı texnologiyalar, elektronika, yarımótkizgishler sanaatı, kánshilik hám qayta islew tarmaqlarındaǵı joybarlar menen shuǵıllanadı. Kompaniya “Fortune 500” global reytingine kirgen. Qıtayda hám onıń sırtında ulıwmalıq kólemi 60 milliard dollardan zıyat bolǵan joybarlardı ámelge asırmaqta. Van Venin Ózbekstanda alıp barılıp atırǵan reformalar baǵdarlaması sırt el, sonday-aq, Qıtay kompaniyaları ushın qolay sharayatlar jaratıp, keń imkaniyatlar ashıp atırǵanın atap ótti. Kompaniya mámleketimizge Oraylıq Aziya regionındaǵı biznestiń bas baǵdarı sıpatında qarap atırǵanlıǵı aytıp ótildi. Mıstı tereń qayta islew hám onnan joqarı qosımsha qunlı innovaciyalıq hám ótimli ónimler, sonday-aq, elektrotexnika, elektromobiller ushın akkumulyator batareyaları, mikroelektronika hám yarımótkizgishler isep shıǵarıw boyınsha perspektivalı joybarlar dodalandı.