Joqarǵı Keńes Baslıǵı bir qatar sırt mámleketlerdiń wákilleri menen turizm boyınsha sóylesiwler alıp bardı

Samarqand wálayatında Dúnya júzilik turizm shólkemi Bas Assambleyasınıń 25-sessiyası bolıp ótpekte. Bul óz gezeginde mámleketimizdegi ashıqlıq hám erkinlik, úlken turizm potencialınıń atap ótiliwi desek aljaspaǵan bolamız. Sessiya sheńberinde Samarqandtaǵı «Ullı jipek jolı» xalıqaralıq turizm orayında Ózbekstannıń turizm potencialı kórgizbesi hám Global investiciya forumı da shólkemlestirilgen.

Investiciya forumında Qaraqalpaqstan Respublikası Joqarǵı Keńes Baslıǵı Amanbay Orınbaev basshılıǵında turizm hám mádeniyat xızmetkerleri hámde isbilermenler toparı qatnasıp, Qaraqalpaqstannıń turizm potencialın forum qatnasıwshıları názerine usındı. Aytıp ótiw orınlı, Global turistlik shólkeminiń 140 tan artıq mámleket wákilleri 20-oktyabrge shekem dawam etetuǵın ilajlarda qatnasıp atır.

Forum sheńberinde Qaraqalpaqstan Respublikası Joqarǵı Keńesiniń Baslıǵı Amanbay Orınbaev Turkiya, Qazaqstan, Qırǵızstan, Ispaniya, Italiya, Germaniya, Qıtay, Yaponiya, Singapur, CHili mámleketleri wákilleri hámde investorlar menen sóylesiwler alıp barıp, turizm tarawında jańa investiciyalıq joybarlardı ámelge asırıw, Qaraqalpaqstannıń turizm potencialın kórsetiw, sırt el turistlerin elimizge keńnen tartıw boyınsha perspektivalı joybarlardı kórip shıqtı.

Qaraqalpaqstan Respublikası Joqarǵı Keńesiniń Málimleme xızmeti