Qaraqalpaqstan Respublikası Joqarǵı Keńesiniń Baslıǵı Amanbay Orınbaev Qubla Koreya mámleketinen kelgen delegaciyanı qabılladı
1179
Búgin Qubla Koreyanıń «Insanlar» fondı wákili CHon Yu Seok, Koreya immigraciya boyınsha adminstrativlik sudı korporaciyası wákili Kim Do Gyun, «Ewha Industrial Power» kompaniyası wákili Li Nam hám basqa da bir qatar wákiller Qaraqalpaqstan Respublikası Joqarǵı Keńesiniń Baslıǵı Amanbay Orınbaevtıń qabıllawında boldı.
Onda Qubla Koreya mámleketi hám Qaraqalpaqstan Respublikası arasındaǵı xalıqaralıq birge islesiwdi keńeytiw máseleleri qarap shıǵılıp, qaraqalpaqstanlı puqaralardı Koreya mámleketinde jumıs penen támiyinlew, islep shıǵarıw, óndiris baǵdarlarında mamanlıǵın arttırıwı ushın múmkinshilik jaratıw, til úyreniwine kómeklesiw sıyaqlı bir qatar áhmiyetli baǵdarlarda sóz etildi.
Aytıp ótiw orınlı, búgingi tez pát penen rawajlanıp baratırǵan dáwirde joqarı tájiriybege iye maman kadrlardı tayarlaw, jańa jumıs orınların jaratıw, puqaralardıń bántligin támiyinlew sıyaqlı máseleler búgingi kúnniń tiykarǵı talaplarınıń birine aylanıp barmaqta.
Búgingi ótkerilgen ushırasıwda da usı baǵdarda birge islesiwdi keńeytiw, respublikamız aymaǵında til úyreniw kursların shólkemlestiriw, jergilikli puqaralardıń Koreya mámleketinde sanaat, óndiris hám islep shıǵarıw tarawlarında jumıs úyreniwine sharayat jaratıw hám bántligin támiyinlew, birge islesiwdi qollap-quwatlaw baǵdarında respublikamızdaǵı «Mono oray»lardıń imkaniyatlarınan paydalanıw sıyaqlı máseleler atap ótildi.
Delegaciya aǵzaları jıllı júz benen qutip alǵanı ushın óz minnetdarshılıǵın bildirdi.
Óz náwbetinde Joqarǵı Keńes Baslıǵı respublika basshıları birge islesiwge barqulla tayar ekenligi, hár qanday jańa baslama qollap-quwatlanatuǵınlıǵın atap ótti.
Qaraqalpaqstan Respublikası Joqarǵı Keńesiniń Málimleme xızmeti