“Jasıl mákan” akciyasına start berildi
1544
Sońǵı jılları húrmetli Prezidentimiz tárepinen mámleketimizde jasıl aymaqlardı keńeytiw hámde ekologiyalıq jaǵdaydı jaqsılawǵa ayrıqsha itibar qaratılmaqta.
Mámleketimizde ámelge asırılıp atırǵan “Jasıl mákan” ulıwma milliy joybarı sheńberinde qala hám rayonlarda hár túrli dekorativ hám miyweli terek nálleri egiliwi dawam ettirilip atır. Usı tiykarda bıyılǵı jıl báhár aylarında qala hám rayonlarımız aymaǵında jámi 9 millionǵa jaqın terek nálleriniń egiliwi támiyinlendi.
Aytıp ótiw orınlı, usı jıldıń 11-oktyabr kúni húrmetli Prezidentimiz tárepinen keńeytilgen tárizde ótkerilgen videoselektor májilisinde bıyılǵı jılı gúz máwsiminde 25-oktyabr hám 1-dekabr sánesi aralıǵında “Jasıl mákan” ulıwma milliy joybarı sheńberinde respublikamız boyınsha 85 million túp terek hám puta nállerin egiw tapsırması belgilep berilgen edi.
Usı tapsırma tiykarında búgin Nókis qalası aymaǵındaǵı “Tele oray” máhállesinde úlken kólemde “Jasıl mákan” akciyası ótkerildi. Onda elimiz abadanlıǵına úles qosıwdı niyet etken jaslar, nuranıylar hám hayal-qızlar qatnasıp, jaqsı niyet penen terek nállerin otırǵızdı.
Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev qatnastı hám elimizdiń abadanlıǵın, qorshaǵan ortalıqtıń tazalıǵın támiyinlew hám jasıl aymaqlardıń payda etiliwinde pútkil xalqımız benen birge at salısıwımız kerek ekenligin atap ótti.
Qaraqalpaqstan Respublikası Joqarǵı Keńesiniń Málimleme xızmeti