Qaraqalpaqstanda samal elektr stanciyaların qurıw hám generatorların islep shıǵarıw boyınsha kelisip alındı

Qaraqalpaqstan Respublikası Joqarǵı Keńesiniń Baslıǵı Amanbay Orınbaev samal elektr stanciyaların qurıw hám generatorların islep shıǵarıw menen shuǵıllanıwshı «Goldwind» kompaniyasınıń biznesti rawajlandırıw boyınsha atqarıwshı direktorı Liu Xiojia, kompaniyanıń biznesti rawajlandırıw boyınsha bas menedjeri Yuan Bo hám basqa da wákiller menen ushırastı. Ushırasıwda «Goldwind» kompaniyası tárepinen respublikamız aymaǵında samal elektr stanciyaların hám generatorların qurıw, bul baǵdarda bar bolǵan múmkinshiliklerden nátiyjeli paydalanıw, generatorlar qurılısı ushın alıp kelinetuǵın ónimler, iri kólemdegi konstrukciyalar islep shıǵarılıwın lokalizaciyalastırıw arqalı jańa stanciyalar qurılısı sanın arttırıw, energiya islep shıǵarıwdı keńeytiw, eń baslısı, jańa jumıs orınların jaratıw máseleleri sóz etildi.

Kompaniya wákilleri bul ámelge asırılıwı rejelestirilip atırǵan jumıslar boyınsha ózleriniń joybarları menen bólisti. Onda sonday-aq, samal elektr stanciyasın qurıw hám aldaǵı waqıtta bul tarawdı rawajlandırıw boyınsha ámelge asırılıwı tiyis jumıslar, birge islesiwdi ele de bekkemlew hám keńeytiw ilajları, jergilikli puqaralardıń bántligin támiyinlew máseleleri haqqında keń túrde pikirlesildi. Aytıp ótiw orınlı, búgingi kúnde respublikamız aymaǵında samal elektr stanciyaların qurıw boyınsha jumıslar baslap jiberilgen bolıp, házirgi waqıtta ámeliy ilajlar dawam ettirilmekte. Ushırasıw sońında eki tárepleme birge islesiwdi jolǵa qoyıw hám bul baǵdardaǵı ilajlardı keńeytiw boyınsha kelisip alındı.  

Qaraqalpaqstan Respublikası Joqarǵı Keńesiniń Málimleme xızmeti