Joqarǵı Keńes Baslıǵı jańa joybarlar iske túsiriliwi boyınsha isbilermenler menen ushırastı
1218
Qaraqalpaqstan Respublikası Joqarǵı Keńesiniń Baslıǵı Amanbay Orınbaev biznesti qollap-quwatlaw hám jańa joybarlardı iske túsiriwde ushırasıp atırǵan mashqalalardı anıqlaw boyınsha isbilermenler menen ushırastı.
Dáslep Joqarǵı Keńes Baslıǵı húrmetli Prezidentimiz tárepinen usı jıldıń 8-avgust kúni isbilermenlerdi qollap-quwatlaw hám Qaraqalpaqstanda isbilermenlikti rawajlandırıw boyınsha 129-sanlı tariyxıy párman qabıl etilgenligin, bunnan tısqarı, mámleketimiz basshısınıń 2022-jıl 31-avgusttaǵı 213-sanlı pármanı menen bir qatar jeńillikler hám múmkinshilikler jaratılǵanlıǵın ayrıqsha atap ótti.
Aytıp ótiw orınlı, Joqarǵı Keńes Baslıǵı tárepinen Prezident pármanı tiykarında jaratılǵan imkaniyatlardan keń túrde paydalanıw, investiciyalıq jańa joybarlardı iske túsiriw, islep shıǵarıw, sanaat hám basqa da baǵdarlardaǵı joybarlardıń turmısqa engiziliwin támiyinlew boyınsha ótkerilgen ushırasıwda bir qatar respublika kólemindegi basshılar, bank baslıqları, qala hám rayon hákimleriniń investiciya hám sırtqı sawda boyınsha orınbasarları tárepinen jańa joybarlardı iske túsiriw baǵdarında wazıypalar belgilengen edi.
Búgingi ótkerilgen ushırasıwda, usı tiykarda usınılǵan joybarlardıń iske túsiriliwi hám bul baǵdarda ushırasıp atırǵan mashqalalar átirapında sóz bardı.
Ótkerilgen ushırasıwda isbilermenler tárepinen bir qatar máseleler kóterildi.
Óz náwbetinde, isbilermenler tárepinen kóterilgen máseleler Joqarǵı Keńes Baslıǵınıń jeke qadaǵalawına alındı hám hár bir jańa jumıs orınların jaratıw niyeti bar isbilermen qollap-quwatlanatuǵınlıǵı atap ótildi.
Qaraqalpaqstan Respublikası Joqarǵı Keńesiniń Málimleme xızmeti