Jańa Ózbekstan – Jasıl mákanda birge jasayıq!

Qaraqalpaqstan Respublikası máhálle belsendileri, nuranıyları, zıyalılar, hayal-qızlar hám jaslar wákilleriniń xalqımızǵa ÚNDEWI Áziz Watanlaslar! Jurtımızdıń hár bir qarıs jeri altınǵa teń. Onıń gózzal tábiyatı, tınıq hawası, shıpabaǵısh suwları hár qanday kisini ózine tartadı. Mine, usınday qaytalanbas gózzallıqtı qásterlep saqlaw, qorshaǵan ortalıqtı, jer hám suw resurslarınan aqılǵa uǵras paydalanıw, olardı keleshek áwladqa sap halında jetkerip beriw hár birimizdiń minnetimiz. Sońǵı jılları Prezidentimiz tárepinen mámleketimizde jasıl aymaqlardı keńeytiw hám ekologiyalıq jaǵdaydı jaqsılawǵa ayrıqsha itibar qaratılmaqta. Mámleketimizde ámelge asırılıp atırǵan “Jasıl mákan” ulıwma milliy joybarı sheńberinde qala hám rayonlardıń aymaqlarında hár túrli dekorativ hám miyweli terek nálleri egilmekte. Ásirese, bıyılǵı jıldıń báhár máwsiminde qala hám rayonlarımız aymaǵında jámi 9 mln. ǵa shamalas terek nálleri egiliwi támiyinlendi. Usı jıldıń 11-oktyabr kúni, húrmetli Prezidentimiz tárepinen keńeytilgen tárizde ótkerilgen videoselektor májilisinde bıyılǵı jıldıń gúz máwsiminde 25-oktyabr sánesinen 1-dekabr sánesi aralıǵında “Jasıl mákan” ulıwma milliy joybarı sheńberinde respublikamız boylap 85 mln. túp terek hám puta nállerin egiw tapsırması belgilep berildi. Mudamı ana tábiyattıń, qorshaǵan ortalıqtıń tazalıǵın hám turaqlılıǵın saqlawǵa umtılıp keletuǵın kóp milletli xalqımızdıń atınan biz Prezidentimizdiń usı baslamasınan ruwxlanıp, bársheńizdi, pútkil xalqımızdı “Jańa Ózbekstan–jasıl mákanda birge jasayıq!” degen ullı ideyanı qollap-quwatlawǵa shaqıramız. Dana xalqımız ázel-ázelden jerge, tábiyatqa júdá itibarlı qatnasta bolıp, hámiyshe onı qásterlep saqlawǵa “Birin kesseń, onın ek”, dep baǵlar jaratıwǵa umtılǵan. Solay eken, milliy qádiriyatlarımızǵa sadıq qalǵan halda, shańaraqta perzent dúnyaǵa kelgeninde oǵan atap nál egiw, kómek jolı menen baǵlar jaratıw, imaratlardıń átirapın kóklemzarlastırıw sıyaqlı iygilikli dástúrlerimizge sáykes tárizde hár bir xojalıq tárepinen 10 túp nál egiw hám ósiriw baslamasın alǵa qoyamız. Sonday-aq, hár bir puqaranıń toy hám basqa da jaqsı kúnlerine nál egiwdi dástúrge aylandırsaq, ne deysizler?! Bul oǵada sawaplı ilaj emes pe? Húrmetli Watanlaslar! Bárinen burın, sońǵı jılları húrmetli Prezidentimiz tárepinen Respublikamızdıń tiykarǵı ózegi bolǵan máhállelerdi abadanlastırıw, sonıń ishinde, “Insan qádiri ushın” principi tiykarında xalqımızdıń abadan turmısta jasawı ushın keń kólemli jumıslardıń alıp barılıp atırǵanın, onı hár bir Watanlasımızdıń óz turmısında tereń sezinip atırǵanın atap ótiw orınlı. Sonıń menen birge, Jurtbasshımızdıń Aral teńiziniń qurıǵan ultanın jasıl mákanlarǵa aylandırıw baǵdarında alıp barıp atırǵan reformaları, dúnyanıń joqarı minberlerinde qorshaǵan ortalıǵımızda ekologiyalıq turaqlılıqtı saqlaw baǵdarındaǵı shaqırıqların da biz tereń seziniwimiz tiyis. Tiykarında, qorshaǵan ortalıǵımızdıń turaqlılıǵın saqlawǵa, óz bosaǵamız hám átirapımızdı abadanlastırıwǵa, onı jasıl baǵlarǵa aylandırıwǵa insanıylıq jáne logikalıq jaqtan da hár birimiz juwapkermiz. Nege degende, xalqımızda “Jaqsıdan baǵ qaladı”, “Ómirińnen bir kún qalsa da terek ek” degen sózler biykarǵa aytılmaǵan. Bizge belgili bolǵanınday, Ana tábiyatımızǵa unamlı qatnasta bolıw, qorshaǵan ortalıǵımızdı taza saqlaw hám kóklemzarlastırıw ata-babalarımızdan bizge qalǵan ullı qádiriyat bolıp tabıladı. Ulıwma aytqanda, tábiyattıń bir bólegi ekenbiz, qorshaǵan ortalıǵımızdı, Ana tábiyatımızdı saqlaw – ózimizdi saqlaw degeni. Xabarıńız bar, áyne payıtta elimizde húrmetli Prezidentimizdiń baslaması menen “Jasıl mákan” ulıwma milliy joybarı sheńberinde máhállelerge, sonıń ishinde, kóshe-qıyabanlar menen úy aldı átiraplarına terek nállerin egiw ilajları baslandı. Bul Siziń de qolıńızdan keledi. Qádirli máhállelesler! Sizlerdi húrmetli Prezidentimizdiń xalqımızdıń aydın keleshegi, aspanımızdıń ashıqlıǵı hám pútkil insaniyat ushın zárúr bolǵan ekologiyamızdıń turaqlılıǵın támiyinlew baǵdarındaǵı iygilikli baslamalarına iyinles bolıp, “Jasıl mákan” ulıwma milliy joybarında belsene qatnasıwǵa shaqıramız! Húrmetli nuranıylar! Sizlerdiń turmıslıq tájiriybeńiz, duwalarıńız hám tileklerińiz xalqımız ushın bárhama úlken tayanısh hám súyenish bolıp kelmekte. Mámleketimizdiń abadanlıǵı, kóshelerimizdiń kórki, shańaraqlarımızdıń bereketin saqlaw, onda keń jámiyetshiliktiń qatnasın támiyinlew boyınsha usı jıl gúz ayların ruwxıy páklik, mánawiy jetiklik, pikirlerdi jańalawǵa umtılıw dáwiri dep táriyiplew múmkin. Barlıq nuranıylar, orta jastaǵılar hám jaslarımız «Jasıl mákan» háreketin qollap-quwatlap bir xojalıq eń keminde úsh túp nál, mákeme, kárxana, shólkemler on bes túpten terek tikse, jurtımız kóklem- zarlıqqa aylanar edi. Búgin jurtımızdaǵı tınıshlıq, xalqımızdıń artıp baratırǵan turmıs dárejesi, qala hám awıllarımızdıń kórkem kelbeti, adamlardıń sana-sezimlerindegi ózgerisler, ulıwma, ómirimizdiń barlıq tarawlarındaǵı ilgerilew watanlaslarımızdıń húrmetli Prezidentimizdiń basshılıǵında alıp barılıp atırǵan reformalarǵa janajan Watanımızdıń keleshegine bolǵan isenimin jáne de bekkemlemekte. Qolaylı hám abadan turmıstı bizge hesh kim, hesh qashan shetten kelip jaratıp bermeytuǵının umıtpaӯımız kerek. Onı ózlerimiz, óz miynetimiz nátiyjesinde jaratsaq, anıǵıraq aytqanda, hár birimiz óz máhállemiz, awılımız, kóshe hám xojalıqlarımızdıń taza hám payızlı bolıwı ushın úlesimizdi qossaq, jurtımız abat mákanǵa aylanadı. Erte sáhárde turıp, kóshe-háwlilerimizdi sıpırıp, dógerekke suw sewip, hár túrli gúller hám terekler egiw qaysı shańaraqqa shıray baǵıshlamaydı deysiz! Bul boyınsha shańaraq iyelerine, jaslarımızǵa másláhátler beriw, jol-joba kórsetiw, dóretiwshilikke shaqırıw, kópti kórgen, tájiriybeli, nuranıy aqsaqallarımızdıń eń baslı wazıypası. Elimizdegi rawajlanıwlar hám ózgerislerde kekse áwlad wákilleriniń tutqan ornı ayrıqsha hám olarǵa mámleketimiz tárepinen qaratılıp atırǵan itibar kúnnen-kúnge artpaqta. Abadanlıq bar jerde qut-bereket, mudamı rawajlanıw hám keleshekke bekkem isenim ruwxı bolatuǵınlıǵın umıtpayıq. Húrmetli diyqan hám fermerler, qıytaq jer iyeleri! Búgingi kúnde Respublikamız rayonlarında 5 mıńnan aslam fermer, 16 mıńnan artıq diyqan xojalıqları hám 342 mıńnan zıyat qıytaq jer iyeleri xızmet etip kelmekte. Jerge mehir beriw, onıń hár bir qarıs jerinen ónimli paydalanıw, nál egip, baǵ jaratıwda sizlerdiń úlesińiz úlken. Bunday sawaplı islerdi dawam ettiriw ushın hár bir xojalıq iyesi óziniń qıytaq jerine, máhálle gúzarı hám kóshesine 10 túpten nál ekse, úlkemizde ortasha 5 million terek payda boladı. Fermerlerimiz “Bir atız – bir ónim” principi tiykarında óz aymaǵında tut, júzim, terek hám basqa nállerdi ekse, hár bir qarıs jerimiz baǵqa aylanadı. Qádirli zıyalılar, ilim, ádebiyat, kórkem óner wákilleri hám sportshılar! Mámleketimizde xalqımızdıń abadanlıǵın támiyinlew, kún-kóris dárejesi hám sapasın arttırıw jolındaǵı baslamalardı qollap-quwatlawda sizlerdiń belsene qatnasıwıńız áhmiyetli. Sizler kibi el tanıǵan dóretiwshilerge, zıyalılar hám sportshılarımızǵa xalqımız, ásirese jaslar háwes penen qaraydı. Solay eken, elimizde ámelge asırılıp atırǵan gúzgi terek egiw máwsiminde sizlerden jańa baslamalar, ámeliy háreketler hám jeke úlgi kútip qalamız! Ádiwli analar, áziz apa-qarındaslar! Shańaraqlarımızdıń bereketi, máhállelerimizdiń kórki Sizler menen gózzal! Tábiyat biz ushın anamızday muqaddes bolıp esaplanadı! Ana hám tábiyat túsinigi bir-birinen ajıralmas túsinik. Anamızdı qanday ádiwlesek, tábiyattı da sonday qádirlewdi perzentlerimizdiń sanasına tereń sińdirip barıwımız shárt! Ásirese, Qaraqalpaqstan sharayatında ekologiyalıq qáwiplerdiń keri tásirlerinen qorǵanıw maqsetinde jasıl aymaqlardı kóbeytiw, kóklemzarlastırıw hám ekologiyalıq jaǵdaydı, hawanıń tazalıǵın jaqsılawǵa itibar qaratılıwı ayrıqsha áhmiyetke iye ekenligin hár birimiz júdá jaqsı bilemiz. Sol ushın da biz analar, ósip kiyatırǵan jas áwladtı tábiyatqa mehir kózi menen qarawǵa, insan tábiyattıń ajıralmas bir bólegi ekenligin uqtırıp barıwımız zárúr. Sebebi, keleshek áwladlarımız ata-babalarımız sıyaqlı baǵı-bostanlardı jaratıwshı, ana tábiyattıń qorǵawshısı bolsın! Sonda ǵana tábiyattı óz halında saqlap, onı keleshek áwladqa sap halında jetkere alamız. Házirgi waqıtta, “Analar – jasıl mákan ushın” baslamasınıń dástúrge aylanıp, máhállelerde “Analar baǵı” shólkemlestirilip atırǵanlıǵı júdá quwanıshlı. Bul jumıslardı ámelge asırıwda máhállelerdegi “Órnekli hayallar” háreketi, kóshebası hayallarımızdıń da múnásip ornı bar. Aldaǵı wazıypamız – usınday qayırlı islerdi xalqımız arasında keńnen en jaydırıp, úlkemizdi baǵı-bostanlarǵa aylandırıwda belsendilik kórsetiw.   Qádirli máhálle belsendi jasları! Áyne waqıtta, ayırım máhállelerde, kóshe hám gúzarlarda bos turǵan, terek egilmegen jerler de kóp. Endigi wazıypamız usı jerlerdi baǵqa aylandırıwda máhálle aymaǵınıń awızbirshiligin kúsheytiw, aymaqtıń abatlıǵı hám xalıqtıń abadanlıǵına xızmet etetuǵın joybarlardı keńeytiwden ibarat bolıp esaplanadı. Onıń ushın hár bir máhállede “Máhálle baǵlar”ın jaratıwımız, jasıl aymaqlardı kóbeytiwimiz, jeke úlgi retinde dáslep óz shańaraǵımız hám kóshemizdi abadanlastırıwımız, “Jasıl mákan” ulıwma milliy joybarına óz úlesimizdi qosıwımız zárúr. Egilgen hár bir nálge qaraw hám saqlawda máhálle belsendileri pidayılıq kórsetiwi kerek. Onıń ushın máhálledegi jaslar jetekshilerin hám bala biylerdi juwapker retinde biriktiriw maqsetke muwapıq boladı. Áziz jaslar! Sizler Jańa Ózbekstannıń keleshegisiz. Prezidentimiz hám xalqımız kútip atırǵan joqarı jetiskenliklerge erisiwde aqıl-parasatıńız, kúsh-ǵayratıńız, ana Watanǵa bolǵan sadıqlıǵıńız júdá áhmiyetli kúshke iye. Ana jerimizge mehir beriń! Nurlı keleshek ushın búginnen baslap óz shańaraǵıńız, kósheńiz, máhálleńizge nál egiń, aymaqta “Jaslar baǵı”n shólkemlestiriwde belsendilik kórsetiń! Hasla umıtpań, siz Ózbekstan perzentisiz, siziń úlesińiz – bul ata-anańız, máhálleńiz hám pútkil xalqımızdıń abadanlıǵı ushın xızmet etedi. Solay eken, bársheńizdi jasap atırǵan mákanımızdı jasıl mákanǵa aylandırıwǵa shaqırıp qalamız. Qádirli Watanlaslar! Terek egiw hám oǵan ǵamxorlıq etiwdi májbúrlik emes al, qádiriyat sıpatında qabıl eteyik! Hár birimiz keleshek áwlad aldındaǵı minnetimizdi tereń sezgen halda, “Jasıl mákan” joybarın pútkil xalıqlıq milliy háreketke aylandırayıq! Bizden perzentlerimizge abat, jasılǵa búrkengen gózzal Watan miyras bolıp qalsın!