Joqarǵı Keńes Baslıǵı «ACWA Power» kompaniyası wákilleri menen ushırastı
1255
Qaraqalpaqstan Respublikası Joqarǵı Keńesiniń Baslıǵı Amanbay Orınbaev Saudiya Arabstanınıń «ACWA Power» kompaniyasınıń Ózbekstandaǵı basshısı Jon Zaidi menen ushırastı.
Onda dáslep, Joqarǵı Keńes Baslıǵı Prezidentimizdiń Qaraqalpaqstanda isbilermenlikti rawajlandırıw hám investiciyalıq ortalıqtı jaqsılaw boyınsha ayrıqsha itibarı, bul baǵdarda qabıl etilip atırǵan qarar hám pármanlar haqqında keń túrde atap ótti.
Ushırasıwda «ACWA Power» kompaniyası tárepinen respublikamızdaǵı Ústirt tegisliginde qurılısı baslanıwı aldında turǵan samal elektr stanciyası joybarın ámelge asırıw, bul baǵdarda kompaniya jumısların alıp barıwdı qollap-quwatlaw, qurılıs jumıslarınıń baslanıwı hám jedel pátte alıp barılıwın támiyinlew sonday-aq, bar bolǵan múmkinshiliklerden nátiyjeli paydalanıw máseleleri sóz etildi.
Aytıp ótiw orınlı, respublikamız aymaǵı samal elektr stanciyaların qurıw ushın qolaylı orınlardıń biri esaplanıp, Ústirt tegisligi úlken múmkinshilik deregi sıpatında xızmet etedi. Quyashlı elimizdiń bul ájayıp diyarı stanciya ushın eń kerekli múmkinshilik esaplanǵan derlik toqtamaytuǵın samalı menen ajıralıp turadı.
Ótkerilgen ushırasıwda samal elektr stanciyasın qurıw ushın Qaraqalpaqstannıń qolaylıqları, aldaǵı waqıtta bul tarawdı rawajlandırıw ilajları, birge islesiwdi ele de bekkemlew hám keńeytiw sıyaqlı áhmiyetli máseleler haqqında keń túrde pikirlesildi.
Ushırasıw sońında Joqarǵı Keńes Baslıǵı hár qanday investor respublika basshıları tárepinen qollap-quwatlanatuǵınlıǵın hám jańa investiciyalıq joybarlardı iske túsiriwge qaratılǵan ilajlarǵa barlıq múmkinshilikler jaratıp beriletuǵınlıǵın atap ótti.
Qaraqalpaqstan Respublikası Joqarǵı Keńesiniń Málimleme xızmeti