Matematika páninen Muhammed al-Xorezmiy atındaǵı II Xalıqaralıq olimpiadasınıń sıylıqlaw máresimi bolıp ótti
1338
Usı jıldıń 25-27-oktyabr kúnleri aralıǵında paytaxtımız Nókis qalasında joqarı oqıw orınları studentleri arasında matematika páninen Muhammed al-Xorezmiy atındaǵı II Xalıqaralıq olimpiadası ótkerildi.
Búgin Berdaq atındaǵı Qaraqalpaq mámleketlik akademiyalıq muzıkalı teatrında Muxammed al-Xorezmiy atındaǵı xalıqaralıq olimpiadasınıń sıylıqlaw máresimi bolıp ótti.
Onda dáslep Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, barlıq qatnasıwshılardı qutlıqladı.
Aytıp ótiw orınlı, sońǵı jılları húrmetli Prezidentimiz tárepinen bilimlendiriwge, ilim-pándi rawajlandırıwǵa hám jaslardıń tárbiyasına ayrıqsha itibar qaratılıp atır. Jaslarımızdıń ozıq oylı, joqarı bilimge iye hár tárepleme jetik insan bolıp kamalǵa keliwinde barlıq múmkinshilikler jaratıp berilmekte.
Bul baǵdarda matematika pánin rawajlandırıw, usı arqalı zamanagóy tarawlar esaplanǵan robototexnika, IT, ekonomika hám basqa da jónelislerdiń keńnen en jayıwına múmkinshilik jaratılıp atırǵanlıǵın ayrıqsha atap ótsek boladı.
2 kún dawamında ótkerilgen xalıqaralıq olimpiadada ulıwma 40 tan aslam joqarı oqıw orınlarınan 200 den zıyat student-jaslar belsene qatnastı.
Ótkerilgen sıylıqlaw máresiminde xalıqaralıq olimpiada jeńimpazlarına diplom, medal hám bahalı sawǵalar tapsırıldı.
Pán olimpiadasında komandalıq esapta I orındı Berdaq atındaǵı Qaraqalpaq mámleketlik universiteti hám Sharof Rashidov atındaǵı Samarqand mámleketlik universiteti, II orındı Túrkmenstan Respublikasınıń Xalıqaralıq gumanitar pánler hám rawajlanıw universiteti, III orındı Mırza Uluǵbek atındaǵı Ózbekstan milliy universiteti jeńip aldı.
Ilaj kórkem óner hám mádeniyat xızmetkerleri atqarıwındaǵı koncert baǵdarlaması menen dawam etti.
Qaraqalpaqstan Respublikası Joqarǵı Keńesiniń Málimleme xızmeti