Ózbekstan hám Franciya Prezidentleri eki tárepleme qatnasıqlardı strategiyalıq sheriklik dárejesine kóteriwge kelisip aldı
1126
Samarqand qalasındaǵı Kongress orayında Ózbekstan Respublikası Prezidenti Shavkat Mirziyoev hám Franciya Respublikası Prezidenti Emmanuel Makronnıń tar sheńberdegi ushırasıwı bolıp ótti.
Ushırasıw aldında mámleketimiz jetekshisi Franciya Prezidentiniń Ózbekstanǵa sońǵı 30 jıldaǵı birinshi saparı tariyxıy áhmiyetke iye ekenin ayrıqsha atap ótti.
Emmanuel Makron mámleketimiz basshısına sapar menen keliw usınısı hám Franciya delegaciyasına kórsetilip atırǵan qızǵın miymandoslıq ushın minnetdarshılıq bildirdi.
Franciya basshısı Jańa Ózbekstanda ámelge asırılıp atırǵan artqa qaytpas reformalar baǵdarlamasın tolıq qollap-quwatladı.
Jetekshiler Franciya menen Ózbekstan arasındaǵı keń kólemli birge islesiwdi jáne de rawajlandırıw máselelerin hár tárepleme dodaladı hám eki tárepleme qatnasıqlardı strategiyalıq sheriklik dárejesine kóteriwge kelisip aldı.
Keyingi jılları kóp táreplemeli Ózbekstan-Franciya qatnasıqları barlıq baǵdarlarda jedel rawajlanıp atırǵanı atap ótildi.
Tovar almasıw hám birgeliktegi kárxanalar sanınıń esesine artqanı qanaatlanıwshılıq penen atap ótildi. Házirgi hám keleshektegi joybarlar portfeli 10 milliard evrodan arttı.
Franciya rawajlanıw agentligi menen 1 milliard evrolıq Strategiyalıq birge islesiw baǵdarlaması ámelge asırılmaqta.
«Jasıl» energetika, shiyki zat resursların qazıp alıw hám qayta islew, innovaciyalıq awıl xojalıǵı, suw támiynatı, logistika, infrastrukturanı rawajlandırıw, turizm hám basqa da tarawlarda jańa iri joybarlardı ámelge asırıw ilajları dodalandı.
Franciya Ózbekstannıń Oraylıq Aziyada isenimdi bekkemlew baǵdarındaǵı háreketlerin, sonday-aq, mámleketimizdiń JDSǵa aǵza bolıwın sonday-aq, Evroawqam menen Keńeytilgen sheriklik hám birge islesiw haqqındaǵı kelisim tez waqıt ishinde qol qoyılıwın bunnan bılay da qollap-quwatlawǵa tayar ekeni atap ótildi.
Siyasiy pikirlesiwdi dawam ettiriw, qáwipsizlik, payda bolıp atırǵan qáwip-qáterlerge nátiyjeli qarsı gúresiw tarawındaǵı birge islesiwdi bekkemlew zárúr ekenligi atap ótildi.
Mádeniy-gumanitarlıq birge islesiw kún tártibiniń bay ekeni qanaatlanıwshılıq penen atap ótildi. Ózbekstanda francuz tilin úyreniwge qızıǵıwshılıq artıp atırǵanı aytıldı. Usı múnásibet penen tárepler Franciya alyansınıń Samarqandtaǵı filialınıń ashılıwın qollap-quwatladı.
Tashkent qalasında Ózbekstan-Franciya joqarı bilimlendiriw mákemesin ashıwdı tezlestiriw hám francuz tili muǵallimlerin tayarlaw baǵdarındaǵı birge islesiwdi keńeytiwge kelisip alındı.
Mámleket basshıları xalıqaralıq hám regionallıq áhmiyetke iye áhmiyetli máseleler boyınsha da pikir alıstı.