Joqarǵı Keńes Baslıǵı Bozataw rayonındaǵı bir qatar sociallıq obektlerdi barıp kórdi

Joqarǵı Keńes Baslıǵı Bozataw rayonı aymaǵında gúz-qıs máwsimine tayarlıq kóriw baǵdarında ámelge asırılıp atırǵan jumıslardı kózden ótkerdi. Atap aytqanda 2-sanlı ulıwma bilim beriw mektebi, 8-sanlı mektepke shekemgi bilimlendiriw shólkemi hámde rayonlıq Medicina birlespeleri, “Aspantay” APJ da jaylasqan 11-sanlı ulıwma bilim beriw mektebi hám awıllıq shańaraq shıpakerlik punkitinde bolıp gúz-qıs máwsimine tayarlıq jumıslarınıń sapası, jılıtıw úskeneleriniń talap dárejesinde ekenligin kórip shıqtı. Sonday-aq mektep oqıwshılarınıń bilim alıw barısı menen jaqınnan tanıstı. Bunnan soń Medicina birlespelerinde emlenip atırǵan nawqaslardan xabar alıp, dári-darmaqlar menen baylanıslı máseleler boyınsha sáwbetlesti. Sonday-aq “Aspantay” APJ aymaǵında “Jasıl mákan” akciyası sheńberinde jańadan jaratılıp atırǵan “Jaslar baǵı”na terek hám miywe nállerin egiw ilájına qatnastı. Ózbekstan Respublikası Ministrler Kabinetiniń 2023-jıl 2-fevral kúngi “Qaraqalpaqstan Respublikasında puqaralar ushın múnásip turmıs sharayatın jaratıw hám máhálleler infrastrukturasın ele de jaqsılaw is-ilajları haqqında”ǵı 52-sanlı qararı tiykarında Bozataw rayonında járdemge mútáj shańaraqlardıń úy-jaylarınıń tóbesin shiferlap beriw, zárúrlerin qaytadan qurıw boyınsha ámelge asırılıp atırǵan jumıslar Joqarǵı Keńes Baslıǵınıń itibarınan shette qalmadı. Turaq-jaylardı ońlaw, jaramsızların qayta qurıp beriw jumısların barıp kórdi hám puqaralardıń hal-jaǵdaylarınan xabar aldı. Jawın-shashınlı kúnlerge qaldırmay qısqa múddette sapalı etip juwmaqlaw boyınsha rayon basshılarına anıq tapsırmalar berildi.  

Qaraqalpaqstan Respublikası Joqarǵı Keńesiniń Málimleme xızmeti