Elimizge kelgen hár qanday miyman I.V.Savickiy atındaǵı qaraqalpaq mámleketlik kórkem óner muzeyin kórmesten ketpeydi. Tatarstan Respublikası basshısı Rustam Minnixanovta bul ádetti shetlep ótpedi. Delegaciyanıń gezektegi mánzili I.V.Savickiy atındaǵı qaraqalpaq mámleketlik kórkem óner muzeyine sayaxat etiw boldı. Bul muzey 1966-jılda shólkemlestirilgen bolıp, oǵan I.V.Savickiydiń miynetleri hám ol toplaǵan qaraqalpaq xalıq ámeliy kórkem óner shıǵarmaları negizinde tiykar salınǵan. Ondaǵı dúrdana shıǵarmalar pútkil dúnya itibarın tartıp, Muzeydiń «Saxradaǵı luvr», «Shıǵıs gáwxarı» dep atalǵanı menen áhmiyetli. Tatarstan Respublikası basshısı muzeyde saqlanıp atırǵan biybaxa eksponatlar menen tanısar eken, bul muzeyge turistler aǵımın elede kúsheytiw boyınsha birge islesiwge tayar ekenligin bildirdi.