Oliy Majlis Senatına hám Nızamshılıq palatasına gezektegi Múrájatın usınbaqta

Bizge belgili, 2019-jıl 22-dekabr kúni Oliy Majlis Nızamshılıq palatasına, xalıq deputatları jergilikli Keńeslerdiń deputatlıǵına saylaw bolıp ótti. Bul áhmiyetli siyasiy ilaj mámleketimiz tariyxında birinshi márte qabıl etilgen Saylaw kodeksi tiykarında, «Jańa Ózbekstan – jańa saylawlar» súreni astında ótti. Saylaw nátiyjelerine bola, Oraylıq saylaw komissiyası Oliy Majlis Nızamshılıq palatasınıń 150 deputat hám Senattıń 97 aǵzasın dizimge aldı, sonıń ishinde, Prezidenttiń 2020-jıl 17-yanvardaǵı pármanı menen Senat aǵzalarınıń 13i saylandı. Solay etip, mámleketimiz nızam shıǵarıwshı hákimiyatınıń jańa quramı qáliplesti. Mámleketimiz basshısınıń Oliy Majliske gezektegi Múrájatı áne usı jańa parlamentke usınılmaqta. Bul abıraylı ánjuman Xalıqaralıq kongress orayında bolıp ótpekte. Onda Oliy Majlis Senatınıń aǵzaları hám Nızamshılıq palatasınıń deputatları, videokonferenciya baylanıs sisteması arqalı rayon, qala hám wálayatlardaǵı jergilikli Keńeslerge saylanǵan xalıq wákilleri, sonday-aq, atqarıwshı hákimiyat hám xojalıq basqarıw uyımlarınıń basshıları, mámleketlik emes shólkemler hám jámiyetshilik wákilleri qatnaspaqta.