Oliy Majlis jumısı jánede jetilistiriledi
1019
Oliy Majlis Nızamshılıq palatasınıń gezektegi májilisinde bir topar deputatlar tárepinen nızamshılıq baslaması huqıqı menen islep shıǵılǵan “ Jańa redakciyadaǵı Ózbekstan Respublikası Konstituciyası qabıllanǵanlıǵı múnásibeti menen Ózbekstan Respublikası Oliy Majlisi jumısın jetilistiriwge qaratılǵan Ózbekstan Respublikasınıń ayrım nızam hújjetlerine ózgeris hám qosımshalar kirgiziw haqqında”ǵı nızam joybarı ekinshi oqıwda statyama-statya kórip shıǵıldı.
— Bul nızam joybarı menen Ózbekstan Respublikasınıń ayrım nızam hújjetlerine Oliy Majlis Nızamshılıq palatası hám Senatınıń jańa redakciyadaǵı Konstituciyada belgilengen tolıq wákillikleri hám parlament qadaǵalawın ámelge asırıwdıń huqıqıy tiykarların jetilistiriw, nızamshılıq usınısların alǵa qoyıw hám nızamlardı qabıllawdıń jańa tártibin ámeldegi nızamshılıqta belgilewdi názerde tutıwshı ózgeris hám qosımshalar kirgizilmekte, — dedi bayanatshı deputat Sherbek Bwronov. — Atap aytqanda, 100 mıńnan kem bolmaǵan puqaralar, Senat,Ombudsman hám Oraylıq saylaw komissiyasınıń nızamshılıq usınısların Nızamshılıq palatasına kirgiziwge haqılı ekenligi bekkemlenbekte. Usı belgilenip atırǵan normalar mámleketlik jumıslardı basqarıwda puqaralardıń qatnasın jáne de keńeytedi. Bunnan tısqarı, nızam joybarı menen Nızamshılıq palatasındaǵı frakciya basshısınıń wákillikleri óz aldına statyada anıq belgilenbekte. Parlament tekseriwin Nızamshılıq palatasınıń deputatları hám Senat aǵzaları arasınan teńlik tiykarında dúzilgen birgeliktegi arnawlı komissiya tárepinen ótkeriliwi názerde tutılmaqta. Nızamshılıq palatası komitetlerine Húkimet aǵzalarınıń esabatları hám mámleketlik uyımları basshılarınıń málimlemesin esitiw baslaması menen shıǵıw huqıqı berilmekte.
Bizge málim bolǵanınday, nızam joybarın jáne de jetilistiriw maqsetinde jámiyetshilik dodalawına qoyılǵan edi. Usı processte 400 ge shamalas usınıs- pikirler kelip tústi hám olar tereń talqılandı. Sonday-aq, ilimiy xızmetkerler hám ekspertlerdiń qatnasıwındaǵı dodalawlarda bildirilgen usınıslar nızam joybarında óz sáwleleniwin taptı, ekinshi oqıwǵa tayarlaw dawamında 40 tan aslam statyalarǵa redakciyalıq dúzetiwler hám qosımshalar kirgizildi. Nızam joybarın statyama-statya dodalaw dawamında deputatlar tárepinen bir qatar soraw hám usınıslar bildirildi. Qızǵın dodalawlardan soń nızam joybarı deputatlar tárepinen qabıllandı.
ÓzA