Xalıqtı kishi hám orta bizneske keńnen tartıwdıń qosımsha ilajları haqqında
1476
Ózbekstan Respublikası Prezidentiniń qararı
Kishi hám orta biznesti finanslıq qollap-quwatlaw, sonıń ishinde, xalıqta isbilermenlik kónlikpelerin qáliplestiriw, olardıń biznes baslamaların qarjılandırıw hám joybarların ámelge asırıwǵa járdemlesiw boyınsha tutas sistema engiziw maqsetinde:
Xalıqtı kishi hám orta bizneske keńnen tartıwdıń tómendegi tiykarǵı baǵdarları belgilensin:
xalıq hám isbilermenlik subektlerin oqıtıw arqalı olardıń biznes baslamaların finanslıq hám konsultativ qollap-quwatlaw sistemasın jolǵa qoyıw hám «shańaraqlıq isbilermen – mikrobiznes – kishi biznes – orta biznes» shınjırı tiykarında olardıń jumısın keńeytiw ushın zárúr sharayatlar jaratıw;
mámleketlik baǵdarlamalar sheńberinde kishi hám orta biznes joybarların «Biznesti rawajlandırıw banki» AKB, «Isbilermenlikti rawajlandırıw kompaniyası» AJ hám basqa da kommerciyalıq banklerden ibarat tutas finanslıq sistema tiykarında qollap-quwatlaw;
isbilermenlikke oqıtıw, kishi hám orta biznes joybarların qarjılandırıw hám biznes processleriniń barlıq basqıshlarında turaqlı birge islesiwdi «Kishi bizneske kómeklesiw orayı» JShJlar hám «Isbilermenlikti rawajlandırıw kompaniyası» AJda, sonday-aq, wákillikli uyımlar hám kommerciyalıq banklerdiń isbilermenlik baǵdarındaǵı elektron platformalarda (keyingi orınlarda – elektron platformalar) ámelge asırıw.
2024-2026-jıllar ushın «Biznesti rawajlandırıw banki» AKB hám «Isbilermenlikti rawajlandırıw kompaniyası» AJ jumısınıń tiykarǵı maqsetli kórsetkishleri etip tómendegiler belgilensin:
a) «Biznesti rawajlandırıw banki» AKB boyınsha:
kishi isbilermenlik subektlerine ajıratılatuǵın kreditler qaldıǵın 1,7 esege arttırıw arqalı kredit portfelindegi úlesin 28 procentten 43 procentke jetkeriw;
kishi biznes joybarların qarjılandırıw ushın xalıqaralıq finans institutları hám sırt el húkimeti finans shólkemlerinen jámi 800 million AQSh dollarǵa shekemgi muǵdarda resurslar tartıw;
300 million AQSh dollar muǵdarında obligaciya (evrobond)lardı xalıqaralıq kapital bazarlarında aylanısqa shıǵarıw;
150 mıń kishi isbilermenlik subektiniń jumısın jolǵa qoyıw hám keńeytiw;
b) «Isbilermenlikti rawajlandırıw kompaniyası» AJ boyınsha:
kishi hám orta isbilermenlik subektlerine kórsetiletuǵın finanslıq xızmetler kólemin 8 trillion sumnan 14 trillion sumǵa jetkeriw;
150 orta biznes kárxanasına úles kirgiziw hám xızmetler ipotekası tiykarında 300 joybardı isbilermenlik subektlerine satıw;
orta isbilermenlik subektleriniń sanın 2,5 esege arttırıw;
300 million AQSh dolları muǵdarında obligaciya (evrobond)lardı xalıqaralıq kapital bazarlarında aylanısqa shıǵarıw.
3.Tómendegiler:
Xalıqtı kishi hám orta bizneske keńnen tartıw boyınsha respublikalıq komissiyası (keyingi orınlarda – Respublikalıq komissiyası) 1-qosımshaǵa muwapıq quramda;
Xalıqtı kishi hám orta bizneske keńnen tartıw boyınsha aymaqlıq komissiyalar 2-qosımshaǵa muwapıq úlgi quramda shólkemlestirilsin.
Respublikalıq komissiya (Qwchqorov) 2023-jıl 15-dekabrge shekem:
aymaqlar hám mámleketlik baǵdarlamalardıń jónelisler kesiminde 2024-jılı 2 million xalıqtı bizneske tartıwdıń maqsetli kórsetkishlerin;
«Biznesti rawajlandırıw banki» AKB hám «Isbilermenlikti rawajlandırıw kompaniyası» AJ jumısınıń tiykarǵı maqsetli kórsetkishlerine erisiw boyınsha anıq ilajlardı (tarmaq kestelerin) tastıyıqlasın.
Ekonomika hám qarjı ministriniń birinshi orınbasarı I.I.Norqulov, Oraylıq bank baslıǵınıń orınbasarı A.A.Turdaliev hám ózlerine biriktirilgen aymaqlar boyınsha Respublikalıq komissiyanıń aǵzalarına xalıqtı kishi hám orta bizneske keńnen tartıwdıń tiykarǵı baǵdarların ámelge asırıw hám maqsetli kórsetkishlerge erisiw wazıypası júklensin.
Respublikalıq komissiya aǵzaları bir ay múddette ózleri biriktirilgen aymaqta hár bir rayon hám qalaǵa shıqqan halda, xalıq hám isbilermenlik subektleri ushın oqıw seminarların shólkemlestirsin.
Tikleniw hám rawajlanıw qorı (Vafaev) bir ay múddette «Kishi biznesti úzliksiz qollap-quwatlaw» kompleksli baǵdarlaması sheńberinde joybarlardı qarjılandırıw ushın «Biznesti rawajlandırıw banki» AKBǵa jámi 300 million AQSh dollar muǵdarında, sonıń ishinde:
75 million AQSh dollar «Biznesti rawajlandırıw banki» AKBnıń ustav kapitalın arttırıwǵa;
225 million AQSh dollar subordinar qarız sıpatında 15 jıl múddetke, 5 jıllıq jeńilletilgen dáwir menen jıllıq 5 procent stavkada qarjılar ajıratsın.
a) kishi hám orta isbilermenlik subektlerine «bir ayna» principi tiykarında xızmet kórsetiw ushın «Kishi bizneske kómeklesiw orayı» JShJlar hám «Isbilermenlikti rawajlandırıw kompaniyası» AJnıń wákilleri belgilengen tártipte Sawda-sanaat palatasınıń aymaqlıq basqarmalarınıń imaratlarına jaylastırılatuǵını;
b) Sawda-sanaat palatası (Vahobov), Isbilermenlerdiń huqıqların qorǵaw boyınsha wákil (Qosimov), Máhálle kesiminde islew hám isbilermenlikti rawajlandırıw agentligi (Ubaydullaev) hár hápte:
máhállelerge shıqqan halda xalıq hám isbilermenlik subektleri arasında mámleketlik baǵdarlamalarda kishi hám orta biznes ushın belgilengen finanslıq imkaniyatlar haqqında úgit-násiyatlaw jumısların alıp baratuǵını;
«Kishi bizneske kómeklesiw orayı» JShJlarda úlgi kónlikpeler tiykarında xalıq hám isbilermenlik subektleri ushın oqıw seminarlardı ótkerip baratuǵını;
potenciallı isbilermenlik subektlerin anıqlap, «Kishi bizneske kómeklesiw orayı» JShJlarǵa hám «Isbilermenlikti rawajlandırıw kompaniyası» AJnıń wákillerine olardıń joybarların ámelge asırıw boyınsha usınıslar beretuǵını belgilensin.
Mámleketlik baǵdarlamalar sheńberinde ajıratılıp atırǵan kreditlerden nátiyjeli paydalanıw, olardıń óz waqtında qaytarılıwın támiyinlew maqsetinde 2024-jıl 1-iyuldan baslap:
kredit ajıratıwdıń barlıq basqıshları (arzanı kórip shıǵıw, qarar qabıl etiw, kepillik beriw hám kredit ajıratıw) sanlastırılǵan halda elektron platformalarda ámelge asırılatuǵını;
kredit támiynatların qadaǵalaw, girewge alınǵan múlklerdi xatlawdan tolıq yamasa bir bólegin shıǵarıw hám almastırıw processleri elektron platformalar arqalı oraylasqan halda shólkemlestiriletuǵını;
málimleme texnologiyaları járdeminde qarıydarlar biznes-rejeler tiykarında jumıs alıp baratuǵını, pul aǵımları hám basqa da kórsetkishlerdi tallaw arqalı qáwip-qáterlerdi aldınnan anıqlaw mexanizmi ámeliyatqa kirgiziletuǵını;
mámleketlik baǵdarlamalar sheńberinde rayon (qala) hám máhállelerge ajıratılatuǵın kreditler kólemi júzege kelgen mashqalalı kreditler úlesinen kelip shıǵıp belgilenetuǵını belgilep qoyılsın.
2024-jıl 1-yanvardan 2026-jıl 1-yanvarǵa shekem mámleketlik satıp alıwlar arnawlı málimleme portalında mámleket qatnasıwındaǵı iri kárxanalar menen kooperaciya tiykarında shólkemlestirilgen kishi isbilermenlik subektlerine ózleri islep shıǵarǵan tovarlardı (ónimlerdi) mámleketlik buyırtpashılarǵa bir finans jılı dawamında jámi 10 milliard sumǵa shekemgi bahada tikkeley shártnamalar tiykarında satıwǵa ruxsat berilsin.
Ekonomika hám qarjı ministrligi bir ay múddette usı bántte názerde tutılǵan shártnamalardı dúziw hám dizimnen ótkeriw ushın mámleketlik satıp alıwlar arnawlı málimleme portalında óz aldına bet shólkemlestirsin hám onı ministrlikler jáne uyımlardıń maǵlıwmatlar bazaları menen integraciyalansın.
Ekonomika hám qarjı ministrligi (Norqulov):
Oraylıq bank (Turdaliev), «Biznesti rawajlandırıw banki» AKB (Annaqlichev), «Isbilermenlik rawajlandırıw kompaniyası» AJ, Sawda-sanaat palatası (Vahobov) hám Isbilermenlerdiń huqıqların qorǵaw boyınsha wákil (Qosimov), menen birgelikte bir hápte múddette mámleketlik baǵdarlamalarda názerde tutılǵan imkaniyatlar hám olarda qatnasıw shártleri haqqında prezentaciya materialları hám videoroliklerden ibarat úlgi qollanbalar tayarlap, Respublikalıq komissiya aǵzaları hám aymaqlıq komissiyalarǵa jetkeriliwi hám elektron platformalarda jaylastırılıwın támiyinlesin;
mápdar uyımlar menen birgelikte eki ay múddette nızamshılıq hújjetlerine usı qarardan kelip shıǵatuǵın ózgerisler hám qosımshalar haqqında Ministrler Kabinetine usınıslar kirgizsin.
Usı qarardıń orınlanıwın nátiyjeli shólkemlestiriwge juwapker hám jeke juwapker etip Bas ministr orınbasarı J.A.Qwchqorov hám Oraylıq banktiń baslıǵı M.B.Nurmuratov belgilensin.
Qarardıń orınlanıwın dodalap barıw, orınlaw ushın juwapker uyımlardıń jumısın muwapıqlastırıw hám qadaǵalaw Ózbekstan Respublikasınıń Bas ministri A.N.Aripovqa júklensin.
Ózbekstan Respublikası
Prezidenti Sh.MIRZIYoEV
Tashkent qalası,
2023-jıl 15-noyabr