Alıs «Kerder»degi baqsha imaratı zamanagóy kóriniske iye bolıp atır

Sońǵı jılları elimizde húrmetli Prezidentimizdiń tapsırmasına tiykar shetki hám awır sharayattaǵı máhálleler infrastrukturasın jaqsılaw, aymaqlardaǵı sociallıq obektlerdi ońlaw, xalqımızǵa múnásip turmıs sharayatın jaratıw baǵdarında kólemli jumıslar alıp barılmaqta. Bul ilajlar sheńberinde Nókis rayonınıń shetki «Kerder» awıl puqaralar jıyınında da bir qatar ilajlar ámelge asırılıp, puqaralardı jıllar dawamında qıynap kelgen máselelerge sheshim tabılıp atır. Atap aytqanda, aymaqtaǵı 9-sanlı mektepke shekemgi bilimlendiriw shólkemi imaratın rekonstrukciyalaw hám jańadan asxana qurıw ushın 3,6 mlrd. sum qarjı ajıratıldı. 150 orınǵa mɵlsherlengen baqsha janında qosımsha 25 orınlı imarat qayta tiklendi. Usı tiykarda zamanagɵy baqshada 175 balanı qamtıp alıw múmkinshiligi jaratılmaqta. Házirgi waqıtta qurılıs jumısları juwmaqlanıw aldında.