Atap ótilgenindey, Húrmetli Prezidentimiz ótken jıldıń avgust ayında Qaraqalpaqstan Respublikasına bolǵan saparı dawamında jaslardı hár tárepleme qollap-quwatlaw, olarǵa keń imkaniyat hám qolaylıqlar jaratıw boyınsha keshiktirip bolmaytuǵın wazıypalarǵa ayrıqsha itibar qarattı. Bul baǵdarda Prezidentimiz tárepinen belgilep berilgen 5 áhmiyetli baslama hámde islep shıǵılǵan “Jol karta”lar jaslarımız turmısında ayrıqsha orın tutpaqta.
Búgingi kúnde Qaraqalpaqstanda 1 million 80 mıńnan aslam jaslarımız bar. Bul bolsa, jaslarımızdıń úlken kúsh hám elimizdiń joqarı potencialı ekenin jáne bir márte dálilleydi. Sonlıqtan da jaslarımızǵa barlıq tarawlarda keń imkaniyatlar jaratıw hám olardı hár tárepleme qollap-quwatlaw búgingi kúnniń eń áhmiyetli máselelerinen sanaladı.
Bul baǵdarda 2019-jılı úlken ilajlar ámelge asırılıp, bir qatar jetiskenliklerge erisildi. Atap aytqanda, jaslardı jumıs penen bánt etiw maqsetinde ótkerilgen miynet yarmarkalarında 3 mıń 400 ge jaqın jaslarımızdıń bántligi támiyinlendi. Jaslar arasında isbilermenlikti bunnan bılay da rawajlandırıw boyınsha da bir qatar jumıslar alıp barıldı. “Jaslar – keleshegimiz” mámleketlik baǵdarlaması tiykarında 168 biznes joybarı ushın 68 milliard swmnan aslam kreditler ajıratılıp, 500 ge jaqın jańa jumıs orınları jaratılǵan bolsa, «Hár bir shańaraq – isbilermen» baǵdarlaması tiykarında 500 den aslam jaslarımız ushın 14 milliard swmlıq kreditler ajıratıldı. 270 ke jaqın isbilermen jaslarımızǵa jer orınları hám paydalanılmay bos turǵan obektler ajıratıp berildi.
Beruniy, Qanlıkól hám Moynaq rayonlarında “Jaslar oray”ları qurılıp, paydalanıwǵa tapsırıldı. Bunnan tısqarı, qala hám rayonlarda 22 “Jaslar miynet gúzarı” kompleksleri qurılıp atırǵan bolsa, búgingi kúnge shekem Xojeli, Ellikqala, Beruniy hám Moynaq rayonlarında paydalanıwǵa tapsırıldı.
Sonday-aq, jas isbilermenler ushın Nókis qalası hám Xojeli rayonlarında “Jas isbilermen” Kovorking oraylarında qurılıs-ońlaw jumısları alıp barılmaqta.
Húrmetli Prezidentimiz 2019-jıl 27-dekabr kúni Muhammed ál-Xorezmiy atındaǵı mektepte jaslar menen bolıp ótken ushırasıwda 2020-jıl Jaslarǵa baylanıslı mámleketlik siyasatta túpkilikli burılıs jılı bolatuǵının atap ótti hám bul baǵdarda áhmiyetli wazıypalardı belgilep berdi. Bul boyınsha «Jaslar siyasatında Qaraqalpaqstan tájiriybesi» islep shıǵılıp, nátiyjeli ámelge asırılmaqta.
Sonıń menen birge, jaslarımızǵa bıyılǵı jılı qosımsha 20 mıń gektardan aslam jer maydanların ajıratıp beriw boyınsha ilajlar alıp barılmaqta. Atap aytatuǵın bolsaq, búgingi kúnde Moynaq rayonında jaslarımızǵa hámde Ayrıqsha jaǵdaylar ministrligi xızmetkerlerine 6 mıń gektar jer maydanları ajıratıp berilip, bul jer maydanlarına aǵın suw jetkerip beriw hám meliorativ halatın jaqsılaw boyınsha anıq ilajlar kórilmekte. Usılar menen bir qatarda, ótken dekabr-fevral aylarınıń ózinde 200 den aslam jaslarımızǵa 5 mıń gektardan aslam jer maydanları ajıratılıp berildi. Jáne bir áhmiyetli tárepi sonda, búgingi kúnde 739 fermer xojalıǵın jaslarımız basqarıp kelmekte.
Sessiyada Qaraqalpaqstan Respublikasında 2020-jılda jaslardıń bántligine kómeklesiw, olardı kásip-ónerge baǵdarlaw, isbilermenlik, fermerlik, ónermentshilik jumısına tartıw hám jaslar migraciyasın tuwrı shólkemlestiriw boyınsha ámelge asırılatuǵın isler haqqında maǵlıwmat berildi. Atap aytqanda, «Jaslar – keleshegimiz» hám «Hár bir shańaraq – isbilermen» Mámleketlik baǵdarlamaları tiykarında 1000 nan aslam jaslarımızǵa jámi 87 milliard swmlıq kreditler ajıratıw rejelestirilmekte.
Jáne bir áhmiyetli tárepi – hár bir sektor hámde taraw basshıları keminde 20 balanı atalıqqa alıwı belgilenbekte. Bunda hár bir basshı atalıqqa alǵan jaslardı isbilermenlikke tartıwı, fermerlikke úyretiwi, jańa jumıs orınların jaratıw arqalı jaslardıń bántligin támiyinlewi, jaslardıń óz dáramatına, jeke múlkine, hátteki, avtomashinasına iye bolıwına erisiwi tiyis ekenligi atap ótildi.
Sonday-aq, bıyılǵı jıldıń dáslepki 6 ayı dawamında Moynaq hám Bozataw rayonlarında jaslarımızdı tigiwshilik, traktor hám arnawlı texnikalardı basqarıw kurslarına tartıw, qıytaq jer xojalıǵı, ıssıxana hám parniklerde ónim jetistiriw hámde bul baǵdarda ámelge asırılıp atırǵan jumıslarǵa jaslardı keńnen tartıw, «Jaslar qurılıs otryad»ların shólkemlestiriw hámde qurılıs, ekologiya hám salamatlıq máseleleri boyınsha volontyorlıq toparların dúziw, «Hár bir jasqa 20 túp nál» súreni astında dekorativ hám miywe nállerin otırǵızıw sıyaqlı wazıypalar belgilep alındı.
Húrmetli Prezidentimizdiń baslaması menen Aral teńiziniń átirapında ekologiyalıq jaǵdaydı jaqsılaw maqsetinde teńiz ultanında bıyılǵı máwsimde 626 mıń gektardan aslam maydanǵa seksewil, qandim, qarabaraq hám baska da shólge shıdamlı ósimlikler egiledi. Bul ilajlarǵa búgingi kúnde 1500 den aslam isshi hám mexanizatorlar, 850 texnikalar, 4 kishi samolyotlar qatnaspaqta. Bul islerde jaslar da belsendilik kórsetip atırǵanı quwanıshlı jaǵday bolıp esaplanadı.
Sessiyada búgingi kúnde jaslardı hár tárepleme qollap-quwatlaw, olarǵa barlıq imkaniyatlardı jaratıp beriw boyınsha tiyisli taraw basshılarına, hákimlerge anıq wazıypalar belgilep berilgenligi, biraq ayırım lawazımlı adamlardıń biyparıqlıǵı sebepli jaslarımız arasında ajırımlar, jınayatshılıq, sırtqı tásirlerge túsip qalıw halatları ushırasıp atırǵanlıǵı sınǵa alındı. Bunday jaǵdaylardı saplastırıwda jaslar ushın jańa jumıs orınların jaratıw, olardıń bántligin támiyinlew máselesi áhmiyetli orın iyeleytugınlıǵı ayrıqsha atap ótildi.
Kún tártibindegi tiykarǵı másele, yaǵnıy jaslardıń bántligin támiyinlew, olardı kásip-ѳnerge úyretiw, isbilermenlik, fermerlik hám ѳnermentshilikti rawajlandırıw, jaslar migraciyası boyınsha sektor basshıları – Qaraqalpaqstan Respublikası Ministrler Keńesiniń Baslıǵı Q.Sariev, Qaraqalpaqstan Respublikası Prokurorı X.Karimov, Ishki isler ministri A.Temirxanov, Salıq basqarması baslıǵı X.Bekchanovtıń málimlemesi tıńlandı. Bul boyınsha Oliy Majlis Senatı aǵzası, Joqarǵı Keńes deputatı, Jaslar awqamı Qaraqalpaqstan Respublikalıq Keńesiniń baslıǵı A.Daniyarov, Joqarǵı Keńes deputatı S.Xojamuratova shıǵıp sóyledi hám deputatlar tiyisli qarar qabıl etti.
Qarar tiykarında Karaqalpaqstan Respublikasında 2020-jılda jaslardı qollap-quwatlaw boyınsha islep shıǵılǵan arnawlı «Jol karta» hám onda belgilengen wazıypalardı ámelge asırıw boyınsha isshi-topar quramı, jaslardıń bántligin támiyinlew boyınsha Mánzilli reje hám bul ilajlardı muwapıqlastırıw boyınsha monitoring toparınıń quramı tastıyıqlandı.
Sessiyada Qaraqalpaqstan Respublikası Joqarǵı Keńesiniń Prezidiumı quramın tastıyıqlaw, Ministrler Keńesi Baslıǵınıń orınbasarların hám Ministrler Keńesiniń aǵzaların tayınlaw máseleleri kórildi. Bul boyınsha tiyisli qarar qabıl etildi.
Sessiyada Joqarǵı Keńes Prezidiumınıń tiyisli qararların tastıyıqlaw haqqında qarar qabıl etildi.
Usınıń menen Qaraqalpaqstan Respublikası Joqarǵı Keńesiniń ekinshi sessiyası óz jumısın juwmaqladı.
Sessiya jumısına Ózbekstan Respublikası Prezidentiniń keńesgóyi T.Xudaybergenov, Prezident keńesgóyiniń orınbasarı, Jaslar awqamı Oraylıq Keńesiniń baslıǵı A.Sadullaev qatnastı.
Qaraqalpaqstan Respublikası Joqarǵı Keńesiniń Baspasóz xızmeti