Qıtay Xalıq Respublikasınıń ayrıqsha hám tolıq huqıqlı elshisi Yuy Czyun respublikamızda bolıp turıptı

Qıtay Xalıq Respublikasınıń ayrıqsha hám tolıq huqıqlı elshisi Yuy Czyun respublikamızda bolıp turıptı Dáslep, sırt mámleket elshisi Qaraqalpaqstan Respublikası Joqarǵı Keńesiniń Baslıǵı Amanbay Orınbaev penen eki tárepleme birge islesiwdi ele de keńeytiw máseleleri boyınsha ushırasqan edi. Kúnniń ekinshi yarımında miymanlar Joqarǵı Keńes Baslıǵınıń orınbasarı R.Saparbaev penen birge I.V.Savickiy atındaǵı Qaraqalpaq mámleketlik kórkem óner muzeyinde bolıp, «Sahra luvrı»nan orın alǵan eksponatlardı tamashaladı. Bunnan soń, Nókis rayonı «Samanbay» APJ aymaǵındaǵı «KPC NUKUS HERBAL TECHNOLOGY» juwapkershiligi sheklengen jamiyeti tárepinen boyan tamır ekstraktın islep shıǵarıw kárxanası jumısların barıp kórdi. Aytıp ótiw orınlı, 5,4 mln. AQSh dolları tiykarında iske túsirilgen kárxanada boyan tamır ekstraktı eksportqa shıǵarılıp kelmekte. Házirgi waqıtta 100 den aslam puqaralar jumıs penen támiyinlengen bolıp, 2022-jılda 1,5 mln. dollar, 2023-jılda 1,8 mln. dollar ónim eksportqa shıǵarılıwına erisildi. Miymanlar menen kárxananıń erisken nátiyjeleri hám aldıńǵı waqıtta rejelestirilip atırǵan jumısları boyınsha sáwbetlesiwler alıp barıldı.  

Qaraqalpaqstan Respublikası Joqarǵı Keńesiniń Málimleme xızmeti