Жоқарғы Кеңес Баслығы Қытай мәмлекетинен келген делегация ўәкиллери менен ушырасты

Qaraqalpaqstan Respublikası Joqarǵı Keńesiniń Baslıǵı Amanbay Orınbaev Qıtaydıń «Travel to Central Asia» kompaniyası bas direktorı Zyu Lixin, «Urumqi Rubber Trade Events» kompaniyası bas direktorı Bay Lu, «Soluxe Travel» agentligi bas direktorı Lyu Ran menen ushırastı Ushırasıwda dáslep Joqarǵı Keńes Baslıǵı búgingi kúnde húrmetli Prezidentimiz basshılıǵında respublikamız aymaǵında turizm tarawın rawajlandırıw, Qaraqalpaqstannıń investiciyalıq tartımlılıǵın arttırıw, isbilermenlikti qollap-quwatlaw baǵdarında qabıl etilip atırǵan párman hám qararlar haqqında keń túrde atap ótti. Sonıń menen birge, turizm tarawın rawajlandırıw boyınsha ámelge asırılıp atırǵan jumıslar, Aralboyı aymaǵındaǵı turizm marshrutları, Ústirt tegisliginiń ájayıp tábiyatı, Aral teńiziniń ótmishinen sóz etiwshi biybaha miyraslar, mádeniy miyras obektlerine itibardı kúsheytiw hám basqa da baǵdarlarda birge islesiwlerdi keńeytiw máseleleri sóz etildi. Onda sonday-aq, húrmetli Prezidentimiz tárepinen ayrıqsha itibar qaratılıp, házirgi waqıtta túpkilikli ózgerisler ámelge asırılıp atırǵan búgingi Moynaq Qaraqalpaqstannıń turistlik aynalarınıń biri bolatuǵınlıǵı ayrıqsha atap ótildi. Óz náwbetinde miymanlar jıllı júzlilik penen kútip alǵanı ushın minnetdarshılıǵın bildirdi hám birge islesiwdi ele de keńeytiw, bar bolǵan múmkinshiliklerden nátiyjeli paydalanıw, túrizmdi rawajlandırıw boyınsha óz-ara baylanıslardı ele de bekkemlew baǵdarında pikirlerin bildirdi. Ushırasıw juwmaǵında Joqarǵı Keńes Baslıǵı birge islesiwdi ele de keńeytiw baǵdarında respublika basshıları barqulla tayar ekenligi hám hár qanday usınıs qollap-quwatlanatuǵınlıǵın atap ótti. Bunnan soń, eki tárepleme birge islesiw boyınsha kelisimge qol qoyıldı.

Qaraqalpaqstan Respublikası Joqarǵı Keńesiniń Málimleme xızmeti