«Xoshamet-2023» jıldıń eń belsendilerin sıylıqlaw saltanatı ótkerildi

Búgin Berdaq atındaǵı Qaraqalpaq mámleketlik akademiyalıq muzıkalı teatrında «Xoshamet-2023» jıldıń eń belsendilerin sıylıqlaw saltanatı bolıp ótti. Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev cózge shıǵıp, sońǵı jılları elimizde xalqımızdıń abadan turmısın támiyinlew boyınsha ámelge asırılıp atırǵan jumıslarǵa keń túrde toqtap ótti. Sonı da ayrıqsha atap ótiw orınlı, húrmetli Prezidentimizdiń Qaraqalpaqstanǵa degen joqarı itibarı menen ótken bir jıl ishinde 7 tariyxıy párman hám qararlar qabıl etildi. Eń baslısı, bul nızam hújjetleri xalqımızdıń búgingi turmısınan razılıǵın támiyinlewge qaratılǵan ilajlarǵa bekkem tiykar bolıp xızmet etpekte. Atap ótiw kerek, búgingi kúnde jaslarǵa ayrıqsha itibar qaratılıp, olardıń tereń bilim alıwı, kásip-óner iyelewi, sport penen shuǵıllanıwı, shet tillerin úyreniwi, isbilermenlikti jolǵa qoyıwı, eń baslısı, hár tárepleme salamat, bárkamal áwlad bolıp kámalǵa keliwi ushın barlıq múmkinshilikler jaratılıp berilmekte. Búgingi ótkerilgen sıylıqlaw saltanatında kúndelikli turmısımızda túrli tarawlarda pidayılıq kórsetip kiyatırǵan jaslar, sonıń menen birge, jaslarǵa baylanıslı mámleketlik siyasattı ámelge asırıwda órnek bolıp kiyatırǵan mámleketlik hám jámiyetlik basqarıw uyımlarınıń wákilleri «Jıldıń eń belsendi birge islesiwshi shólkemi», «Jaslar mashqalaların sheshiwdegi belsendiligi ushın», «Jıldıń eń belsendi máhálle jaslar jetekshisi» hám basqa da 19 nominaciya boyınsha «Xoshamet – 2023» sıylıǵı menen xoshametlenip, olarǵa diplom hám bahalı sawǵalar tapsırıldı. Sıylıqlaw máresimi jas atqarıwshılar, kórkem óner hám mádeniyat xızmetkerleri tárepinen tayarlanǵan koncert baǵdarlaması menen dawam etti.  

Qaraqalpaqstan Respublikası Joqarǵı Keńesiniń Málimleme xızmeti