Prezidentimizdiń Qaraqalpaqstanǵa bolǵan ayrıqsha itibarı nátiyjesinde respublikamızdaǵı 43 432 turaq jayda jasawshı puqaralardıń mashqalası óz sheshimin tabadı
1478
Húrmetli Prezidentimizdiń ayrıqsha itibarı hám ǵamxorlıǵı nátiyjesinde xalqımızdıń abadan turmısın támiyinlew boyınsha oǵada kólemli jumıslar alıp barılıp atır. Kóp sanlı puqaralarımız tárepinen kóshpeli qabıllawlarda hám kóshe biyleri menen ushırasıwlarda kóterilgen úy-jaylardıń kadastr hújjetleri menen baylanıslı mashqalalarǵa sheshim tabıw baǵdarında húrmetli Prezidentimizdiń Qaraqalpaqstanǵa bolǵan saparı dawamında respublikamız ushın óz aldına kadastr hújjetlerin rásmiylestirip beriw máselesi itibarǵa alınıp, usı mashqalanı sheshiw boyınsha wáde berilgen edi. Kóp uzamay puqaralarımız kútken jáne bir tariyxıy pármanǵa qol qoyılıp, Prezidentimizdiń «Qaraqalpaqstan Respublikası xalqın sociallıq qollap-quwatlaw hámde fizikalıq shaxslar tárepinen qurılǵan úy-jaylarǵa bolǵan huqıqlardı tán alıw haqqında»ǵı 119-sanlı pármanı qabıl etildi. Párman boyınsha Qaraqalpaqstan Respublikası Joqarǵı Keńesiniń Qaraqalpaqstan Respublikası aymaǵında puqaralardıń huqıqın belgilewshi hújjetlersiz qurılǵan 43 432 úy-jaylar jaylasqan jer uchastkasına ijara huqıqın, onda jaylasqan imaratlarǵa múlk huqıqın tán alıw haqqındaǵı usınıs qollap-quwatlandı. Yaǵnıy, Prezidentimizdiń tikkeley qollap-quwatlawı menen 43 432 hújjetleri joq úylerdiń kadastr hújjetleri rásmiylestirilip beriliwi belgilendi. Parmanǵa tiykar úlgi sıpatında Xójeli hám Taqıyatas rayonlarındaǵı turaq jay obektlerinde Respublika isshi toparı tárepinen úyreniw jumısları alıp barıldı hám Xalıq deputatları rayonlıq keńesleri usınıs etken hújjetsiz qurılǵan jámi 232 turaq jaylarǵa múlk huqıqın hám jer uchastkasına ijara huqıqın tán alıw boyınsha Qaraqalpaqstan Respublikası Joqarǵı Keńesiniń Prezidium qararı qabıl etildi. Bárshemizge málim, kadastr hújjeti joq bolǵanlıǵı sebepli usı turaq jaylarda jasawshı puqaralardıń aldında bir qatar mashqalalar boy kórseter edi. Usı tiykarda dáslepki 232 úyde jasawshı ulıwma mıńnan aslam puqaranı qıynap kelgen mashqalalar óz sheshimin taptı. Pármannıń orınlanıwı boyınsha tiyisli jumıslar barlıq qala hám rayonlarımızda dawam ettiriledi hám puqaralarımızdıń turmıs abadanlıǵın támiyinlewdiń barlıq zárúrli ilajları kóriledi.
Qaraqalpaqstan Respublikası Joqarǵı Keńesiniń Málimleme xızmeti