Joqarǵı Keńes Baslıǵı Qıtay mámleketinen kelgen investorlar menen ushırastı

Qıtay Xalıq Respublikası elshisiniń usınısı menen Qıtaydıń Fuczyan provinciyasınıń «Sichuan Metallurgical Control Group Co., Ltd.» kompaniyası wákilleri Qaraqalpaqstan Respublikası Joqarǵı Keńesiniń Baslıǵı Amanbay Orınbaevtıń qabıllawında boldı. Ushırasıwda dáslep, húrmetli Prezidentimizdiń Qaraqalpaqstanǵa bolǵan ayrıqsha itibarı, puqaralardıń turmıs abadanlıǵın támiyinlew, regionda isbilermenlikti rawajlandırıw, investiciya tartımlılıǵın arttırıw baǵdarında qabıl etilgen qarar hám pármanlar hám usı tiykarda jaratılgan múmkinshiliklerge ayrıqsha atap ótildi. Onda dáslep, «Sichuan Metallurgical Control Group Co., Ltd.» tárepinen Qaraqalpaqstan Respublikasına dáslepki basqıshta 35 million AQSh dolları muǵdarında investiciya kirgiziw arqalı altın hám mıstı qayta islew, tayar ónimler islep shıǵarıwǵa shekemgi mıs klasterin shólkemlestiriw joybarın ámelge asırıw boyınsha máseleler talqılandı. Ótkerilgen ushırasıwda respublikamız aymaǵında jańa investiciya joybarların iske túsiriw, bul baǵdarda birge islesiwdi jolǵa qoyıw, Qıtay-Ózbekstan, sonıń ishinde Qaraqalpaqstan menen birge ornatılǵan baylanıslardı jańa joybarlar arqalı ele de dawam etiw, Qaraqalpaqstanda taw-kán sanaatın rawajlandırıw, metal rudaların qazıp alıw, qayta islew hám islep shıǵarıw hám basqa da bir qatar joybarlar haqqında sóz etildi. Óz gezeginde Joqarǵı Keńes Baslıǵı respublikamız aymaǵında iri kólemli joybarlardı ámelge asırıw barqulla qollap-quwatlanatuǵınlıǵı hám investorlardıń jumıs orınların jaratıwǵa qaratılǵan hár qanday baslamasına barlıq múmkinshilikler jumsalatuǵınlıǵın atap ótti.

Qaraqalpaqstan Respublikası Joqarǵı Keńesiniń Málimleme xızmeti