Haqıyqatında da, ǵalaba xabar qurallarınıń jumısına tolıq erkinlik berilip, baspasóz, internet saytları, televidenie hám radiolarda analitikalıq hám sın materiallar keń orın almaqta. ǴHQda insanlardı oylandırıp atırǵan máseleler, sheshilmey atırǵan mashqalalar kóterilip atırǵanı quwanıshlı jaǵday, álbette. Bul tendenciya reformalarımızdıń nátiyjesin arttırıwǵa, jámiyetlik qadaǵalawdı, puqaralarımızdıń jámiyetlik belsendiligin kúsheytiwge xızmet etpekte.
Sonın menen bir qatarda, Ózbekstan Respublikası Prezidentiniń 2019-jıl 27-iyundaǵı «Ǵalaba xabar qurallarınıń biyǵárezligin támiyinlew hám mámleketlik uyımlar jáne shólkemlerdiń málimleme xızmetleriniń jumısların rawajlandırıw boyınsha qosımsha ilajlar haqqında»ǵı qararı tiykarında mámleketlik basqarıw uyımlarında málimleme xızmeti shólkemlestirilip, jumıs alıp barıp atır.
Bul óz gezeginde, mámleket hám jámiyet arasında sapalı pikirlesiwdi jolǵa qoyıw, xalıqqa reformalardıń maqseti, wazıypaları hám nátiyjeleri haqqında operativ, qalıs, tolıq isenimli málimleme jetkeriw, mámleketlik hám xojalıq basqarıw uyımları, jergilikli mámleketlik hákimiyat uyımları jumısınıń ashıq-aydınlıǵın arttırıw, sonday-aq, olardıń jámiyetshilik penen óz-ara birge islesiw baylanısların hám málimleme xızmetleri jumısınıń nátiyjeliligin túp-tiykarınan jaqsılawǵa xızmet etpekte.
Húrmetli Prezidentimiz 2019-jılı Baspasóz hám ǵalaba xabar quralları xızmetkerlerine jollaǵan bayram qutlıqlawında málimleme ortalıǵındaǵı hár qıylı pikir-talaslar, eń aldı menen, haqıyqatlıq hám qalıslıq principlerine tiykarlanıwı, nızam hám ádep-ikramlılıq qaǵıydaları sheńberinde bolıwı, jeke ǵárez hám ósh alıwǵa, jalǵan abıray arttırıw usılına aylanıp ketpewi, insan shaxsı hám mártebesin ayaq astı etiwden awlaq bolıwı, bunday unamsız jaǵdaylarǵa biziń media ortalıǵımızda ulıwma orın bolmawı kerekligin ayrıqsha atap ótken edi.
Tilekke qarsı, ǵalaba xabar quralları tarawında haqıyqıy pidayı, jankúyer kásipleslerimiz, jaslarımız benen bir qatarda sóz erkinligi – bul eń aldı menen juwapkershilik ekenligin umıtıp qoyıp, sın pikir degen sıltaw menen anıq faktlerge tiykarlanbaǵan, hár túrli jollar menen jámiyette tek unamsız pikirdi oyatatuǵın, xalıqtı mámleketlik siyasatqa qarsı baǵdarlaytuǵın hár túrli ósek, jala materiallar járiyalanıp atırǵan jaǵdaylar da ushırasıp atır.
Sonlıqtan da ushırasıwda málimleme xızmeti basshıları menen ǴXQ jurnalistleri hám blogerler arasındaǵı informaciya almasıw baylanısların bekkemlew, anıq faktlerge súyeniw, jurnalistlik etikanı saqlaw, málimleme alıw hám onı keń jámiyetshilikke jetkerip beriwde bir táreplemeliktiń aldın alıw sıyaqlı máseleler tiykarǵı dıqqat-itibarda boldı.
Ushırasıwda mámleketlik basqarıw uyımları málimleme xızmetleri menen ǵalaba xabar qurallarınıń birge islesiwindegi mashqalalar hár tárepleme dodalandı hám bul boyınsha pikir-usınıslar bildirildi.
Qaraqalpaqstan Respublikası Joqarǵı Keńesiniń Baspasóz xızmeti