Qaraqalpaqstan Respublikası Joqarǵı Keńesi Baslıǵınıń Xalqımızǵa Jańa jıl qutlıqlawı
1505
Xalqımızǵa Jańa jıl qutlıqlawı Qádirli watanlaslar! Áziz doslar! Eń dáslep, bársheńizdi ózinde ullı maqset hám iygilikli islerdi jámlep, xalqımızdı jáne de úlken dóretiwshilik jumıslarǵa ruwxlandırıp atırǵan qutlı áyyyam – Jańa jıl bayramı menen qızǵın qutlıqlayman. Búgin xalqımız tınısh hám tatıw turmısta, erteńgi kúnge anıq maqsetler menen keleshekke isenimli qádem taslap barmaqta. Ótip baratırǵan jıl elimizdiń jańa tariyxına altın háripler menen jazılıp qalatuǵın óziniń umıtılmas tariyxıy waqıyaları, turmısımızdıń barlıq tarawlarındaǵı ózgerisleri hám jańalanıwları menen ajıralıp turatuǵın dáwir sıpatında kewillerden tereń orın iyeleydi. Ásirese, húrmetli Prezidentimizdiń ayrıqsha ǵamxorlıǵı menen ѳtken bir jıldıń ishinde tek ǵana Qaraqalpaqstan ushın qabıl etilgen 7 tariyxıy párman hám qararlar tiykarında xalqımızǵa, sonıń ishinde jaslarımızǵa, isbilermenlerimizge burın bolmaǵan imkaniyatlar jaratılǵanlıǵı, máhállelerde keń kѳlemli qurılıs-ońlaw hám abadanlastırıw jumıslarınıń alıp barılǵanı kewillerge maqtanısh sezimlerin baǵıshlaydı. Atap aytqanda, juwmaqlanıp atırǵan jılda 452 máhálleniń hár birine 500 million swmnan, jámi 226 milliard swm qosımsha qarjı berilgenin, kadastrı bolmaǵan 43 mıńnan aslam turaq jaylardıń kadastr hújjetlerin tayarlaw jumıslarınıń jolǵa qoyılǵanın, qala hám awıllarımızdı abat etiw maqsetinde 640 km.ge jaqın topıraqlı jollarǵa 55 milliard 678 million swmlıq qum-щeben aralaspasın tósew jumısları alıp barılǵanın, Mádeniyattı qollap-quwatlaw fondı shólkemlestirilip, bul fondqa 20 milliard swm qarjı ajıratılǵanın, jaslarımızdıń joqarı oqıw orınlarına kiriwi ushın 10 mıń kvota ajıratılǵanın, sırt ellerde oqıp atırǵan jaslardıń oqıwın elimizdiń joqarı oqıw orınlarına mámleketlik grant tiykarında kóshiriw ámeliyatınıń jolǵa qoyılǵanın, isbilermenlerimiz ushın jańadan-jańa imkaniyatlar jaratılıp, olardıń ekonomikalıq jaqtan bekkemleniwine tiykar jaratılǵanın ayrıqsha qanaatlanıwshılıq penen aytıp ѳtsek boladı. Sonday-aq, izde qalıp baratırǵan jılda xalqımızdıń iygiligi jolında xızmet etetuǵın bir neshe kárxanalardıń, sociallıq-mádeniy obektlerdiń iske túskeni, infrastrukturanıń jańalanıwı elimizge shın mánisindegi jańalanıw nápesin alıp kelip, xalqımızdı turmıstan razı etiwge tiykar bolmaqta. Sѳzimizge mısal retinde mámleketlik baǵdarlamalar sheńberinde jámi 699 obektte 1,6 trillion swmlıq qurılıs hám rekonstukciya jumısları alıp barılǵanı, sonıń ishinde Investiciya baǵdarlaması tiykarında 58 obektte 547,9 milliard swmlıq, máhállelerde 286 obektte 238 milliard swmlıq qurılıs-ońlaw jumısları ámelge asırılǵanı, bunnan tısqarı, 33 kóp qabatlı turaq jaylar jańadan kurılıp, 69 kóp qabatlı turaq jaylarda ońlaw jumısları alıp barılǵanı turmısımızda júz bergen quwanıshlı waqıyalar qatarına kiredi. Sonday-aq, juwmaqlanǵan jılda Qıtay mámleketi menen 432,7 million dollarlıq 17 investiciyalıq joybar, 27 million dollarlıq 32 eksport hám import shártnamaları boyınsha, sonday-aq, Tatarstan Respublikası menen 58 million dollarlıq 23 eksport shártnamaları boyınsha kelisimlerge erisilgeni elimiz ekonomikasın jáne de bekkemlewde, xalıqtıń bántligin támiyinlewde ayrıqsha orın tutadı. Bunnan tısqarı, aymaqlıq investiciya baǵdarlamaları tiykarında 3,1 trillion swmlıq 1434 investiciya joybarı iske túsip, 10256 jańa jumıs ornı jaratıldı. Álbette, bulardıń barlıǵı elimizde “Insan qádiri ushın” degen ideya astında alıp barılıp atırǵan iygilikli islerdiń ámeliy kѳrinisi sanaladı. Qádirli watanlaslar! Kirip kiyatırǵan Jańa jıl ózinde taǵı da joqarı maqset hám wazıypalardı jámlep, bársheni ullı islerge baslamaqta. Jańa jılda da xalqımızdıń turmıs dárejesin jaqsılaw, olardıń bántligin támiyinlew, ásirese, kem támiyinlengen, járdemge mútáj shańaraqlarǵa járdem kórsetiw, jaslardı hám hayal-qızlardı qollap-quwatlaw, isbilermenlikti jedel rawajlandırıw sıyaqlı bir qatar máseleler tiykarǵı wazıypalarımızdıń biri bolıp qala beredi. Dóretiwshi xalqımız mine usınday juwapkerli wazıypalardı ámelge asırıwǵa múnásip úles qosatuǵınına, elimizdiń táǵdiri hám onıń keleshegi jolındaǵı sawaplı islerge belsene qatnasatuǵınına bekkem isenemiz. Sizlerdi jáne bir márte Jańa jıl bayramı menen qızǵın qutlıqlap, bársheńizge bekkem densawlıq, mol tabıslar tileymen! Jańa jıl hár bir shańaraqqa amanlıq, bereket hám quwanısh alıp kelgey! Elimiz tınısh, xalqımız hámiyshe aman bolsın! Jańa jılıńız bársheńizge qutlı múbárek bolsın, áziz zamanlaslar!
Amanbay ORÍNBAEV, Qaraqalpaqstan Respublikası Joqarǵı Keńesiniń Baslıǵı