Prokuratura uyımları xızmetkerleri hám veteranlarına

Húrmetli prokuratura xızmetkerleri! Húrmetli veteranlar! Bárinen burın, siz áziz nızam saqshıların 8-yanvar – Ózbekstan Respublikası prokuratura uyımları xızmetkerleri kúni menen qızǵın qutlıqlayman. Bárshemiz jaqsı túsinemiz, búgingi kúnde Jańa Ózbekstandı qurıw jolında ámelge asırılıp atırǵan barlıq reformalarımızda nızam ústinligin támiyinlew sheshiwshi áhmiyetke iye bolmaqta. Nızam húkimdar bolǵan jámiyette álbette, ádillik, jámiyetlik-siyasiy turaqlılıq, ekonomikalıq ósiw hám rawajlanıw boladı, insan qádiri, huqıqları menen mápleri támiyinlenedi. Bunday áhmiyetli maqsetlerge erisiwde prokuratura uyımları hám bul sistemada xızmet etip atırǵan, óz kásibi hám wazıypasına sadıq, watansúygish insanlardıń roli úlken ekenin búgin ayrıqsha atap ótiwimiz orınlı. Qádirli doslar! Sizlerge belgili, keyingi jıllarda prokuratura tarawın túpkilikli reformalaw, bul baǵdarda ashıq-aydınlıq hám ádillikke tiykarlanǵan, puqaralar hám jámiyet mápine xızmet etetuǵın, xalıqtıń mápin gózleytuǵın qararlar qabıl etiw, óziniń teoriyalıq hám ámeliy mektebine, pidáker hám professional xızmetkerler korpusına iye bolǵan sistemanı qáliplestiriw boyınsha úlken jumıslardı ámelge asırmaqtamız. Elimizdiń Konstituciyamızda bekkemlengen huqıqları menen erkinliklerin isenimli qorǵawda, nızamlılıqtı támiyinlew, jınayatshılıqtıń aldın alıwda prokuratura uyımlarınıń áhmiyeti barǵan sayın artıp barmaqta. Ásirese, xalıq penen ashıqtan-ashıq sóylesiw, xalıqtıń mashqalaların tereń úyreniw hám sheshiw, insan huqıqları menen erkinliklerin qorǵaw taraw xızmetkerleriniń eń tiykarǵı hám kúndelikli wazıypasına aylandı. Prokuraturanıń nızamlar orınlanıwı ústinen qadaǵalaw alıp barıw jumısı túp-tiykarınan ózgertildi. Burın nızam buzılıw jaǵdayların anıqlaw hám jazalawǵa tiykarǵı orın berilgen bolsa, endi tiykarǵı itibar bunday jaǵdaylardıń aldın alıw, mashqalalardı saplastırıwǵa qaratılmaqta. Eń áhmiyetlisi, prokuratura sisteması da, adamlarımızdıń oǵan bolǵan múnásibeti de ózgermekte. Búgingi kúnde elimizde prokuratura tımsalında «jazalawshı uyımdı» emes, al xalıq hám isbilermenliktiń buzılǵan huqıqların tiklewge járdemlesetuǵın, olardıń dártine sherik, mádet bolıwǵa háreket etetuǵın xalıqshıl strukturanı kórmekte. Onı keyingi jeti jılda prokuratura uyımları tárepinen 2 millionǵa shamalas múrájat unamlı sheshilip, 300 mıńnan aslam puqaranıń buzılǵan huqıqları tiklengeni, 148 mıńǵa shamalas isbilermenniń mashqalalarına sheshim tabılǵanı da tastıyıqlaydı. Kadrlardıń mamanlıǵın arttırıw, sonday-aq, tergew hám huqıq qorǵaw boyınsha qánigeler tayarlaw sistemasın sapa jaǵınan jańa basqıshqa kóteriw maqsetinde Bas prokuratura akademiyası negizinde Ózbekstan Respublikası Huqıq qorǵaw akademiyası dúzildi. Búgingi kúnde isbilermenlik hám investiciya, qurılıs baǵdarlarında, jer resurslarınan paydalanıwda nızam buzılıwınıń aldın alıw, hayal-qızlar hám jaslardıń huqıqların támiyinlew jáne olardı kúsh kórsetiw hám zorlıqtan qorǵaw, janılǵı-energetika hám ekologiya, mádeniy miyras hám sport tarawlarında nızam ústinligin támiyinlewge qaratılǵan nátiyjeli prokurorlıq qadaǵalaw sisteması jolǵa qoyıldı hám óziniń unamlı nátiyjelerin bermekte. Bas prokuratura janındaǵı Ekonomikalıq jınayatlarǵa qarsı gúresiw departamenti tárepinen ótken dáwirde 53 mıńnan aslam huqıqbuzarlıqlar hám jınayatqa shek qoyıldı, mámleket hám jámiyettiń máplerine jetkerilgen 4,7 trillion sum zıyan óndirildi, 15 mıńnan aslam shaxstıń jumısına nızamlı baha berilip, olardıń isbilermen sıpatında dizimnen ótiwi támiyinlendi. Prokuratura janında Májbúriy orınlaw byurosınıń shólkemlestiriliwi orınlaw isin júrgiziw boyınsha tártipsizlikler saplastırılıp, qatań tártip ornatıwǵa imkaniyat jarattı. Tek ǵana ótken jıl dawamında 36 trillion sum muǵdarında sud hújjetleriniń orınlanıwı támiyinlendi. Húrmetli taraw xızmetkerleri! Mámleketimizde «Nızam – ústin, jınayat jazasız qalmaydı» degen iygilikli princip tiykarında nızamlılıqtı támiyinlew baǵdarındaǵı jumıslarımız sheshiwshi basqıshqa kirip atırǵan házirgi waqıtta hár bir prokuratura xızmetkeri bir haqıyqattı tereń ańlap jetiwi zárúr. Qashan adamlarımız turmısında qáterjamlıq, ruzıgershiliginde abadanlıq hám bereket boladı, qashan olarda erteńgi kúnge isenim artadı? Qashan elimizde nızamlar qaǵazda emes, al ámelde ayrıqsha orınlanǵan, reformalar hár bir shańaraq, hár bir máhállege kirip, watanlaslarımız olardıń ámeliy nátiyjesin óz kúndelikli turmısında sezingen jaǵdayda bul maqsetke tolıq erisiw múmkin. Xalqımızdıń awırın jeńil etiw, jańa jumıs orınların jaratıw, kámbaǵallıqqa qarsı gúresiwge qaratılǵan baǵdarlamalarımızdıń orınlanıwın izbe-iz shólkemlestiriw, qorshaǵan ortalıq, tábiyǵıy baylıqlar hám mádeniy miyrasımızdı kóziniń qarashıǵınday qásterlep saqlaw, medicina, bilimlendiriw sıyaqlı tarawlardaǵa reformalarımızdı dawam ettiriw hám bul baǵdarda nızam buzılıwına mawasasız bolıw – prokuratura xızmetkerleriniń konstituciyalıq minnetlemesi hám eń tiykarǵı wazıypası bolıp esaplanadı. Bunı hesh kim umıtpawı kerek. Elimizde korrupciya illetine qarsı gúresiw procesi ulıwmaxalıqlıq háreketine aylanıp atırǵan búgingi kúnde prokuratura xızmetkerleri ayrıqsha belsendilik kórsetip, óz baslamaları menen hámmege úlgi bolatuǵınına isenemen. Mine, usı maqsetlerde prokuratura uyımlarınıń jumısına aldınǵı jumıs usılların hám sanlı texnologiyalardı keńnen engiziw, nızamlardıń orınlanıwı ústinen qadaǵalaw mexanizmlerin turaqlı jetilistiriw, jınayatshılıqqa qarsı gúresiw hám tergew isine zamanagóy ilim hám ámeliyat jetiskenliklerin engiziw, xızmetkerlerdiń bilim dárejesi hám ruwxıy-aǵartıwshılıq sana-sezimin arttırıw, olardıń pidákerlik miynetin múnásip qádirlew keleshekte de itibarımız orayında boladı. Prokuratura xızmetkerleri nızamdı qorǵaw – bul xalıq hám Watandı qorǵaw sıyaqlı muqaddes minnetleme ekenin tereń ańlap, moynındaǵı oǵada juwapkershilikli hám abıraylı wazıypanı bunnan bılay da nátiyjeli orınlaytuǵınına isenimim kámil. Sizlerdi kásiplik bayramıńız benen jáne bir márte qızǵın qutlıqlap, bársheńizge bekkem densawlıq, baxıt hám áwmet, shańaraqlarıńızǵa qut-bereket, nızam hám ádillik ústinligin támiyinlew jolındaǵı jumıslarıńızda úlken tabıslar tileymen.  

Shavkat Mirziyoev,

Ózbekstan Respublikası Prezidenti