Joqarǵı Keńes Baslıǵınıń orınbasarı Qubla Koreya mámleketinen kelgen delegaciya menen ushırastı

Qaraqalpaqstan Respublikası Joqarǵı Keńesi Baslıǵınıń orınbasarı R.Saparbaev Qubla Koreyanıń Awıl hám toǵay xojalıǵı ministrligine qaraslı Haywanatlar hám ósimlikler karantini agentligi másláhátshisi Nam Bok Li basshılıǵındaǵı ekspertler hám Koreya xalıqaralıq birge islesiw agentligi (KOICA) wákilleri menen ushırastı.

Onda elimizde ósimlikler karantini hám qorǵalıwın támiyinlew, ziyanlı organizmlerge qarsı gúresiw, elimizge alıp kelinip atırǵan awıl xojalıǵı ónimleri ushın fitosanitariyalıq xızmet kórsetiw hám basqa da usı baǵdardaǵı ámeliy jumıslar boyınsha pikirlesildi. Aytıp ótiw orınlı, ótken 2023-jılda Ósimlikler karantini hám qorǵalıwı agentligi hám Koreya xalıqaralıq birge islesiw agentligi (KOICA) arasında ulıwma bahası 6,7 mln. dollarlıq «Ózbekstan fitosanitariya xizmeti potencialın rawajlandırıw hám ósimlikler karantini shegara punktlerin jetilistiriw» joybarına qol qoyılǵan edi. Joybar sheńberinde Qaraqalpaqstanda 700 mıńnan 1 mln. dollarǵa shekemgi jumıslar ámelge asırılıwı rejelestirilgen bolıp, «Dawıt ata» shegara ótkeriw punktinde laboratoriya shólkemlestiriw hám zárúrli ásbap-úskenelerin alıp keliw, Nókis qalasında jańa ofis shólkemlestiriw belgilenbekte. Búgingi ótkerilgen ushırasıwda da usı baǵdarda birge islesiwdi jolǵa qoyıw hám keńeytiw, shegara ótkeriw punktlerinde fitosanitariyalıq xızmet kórsetiw orayın shólkemlestiriw, usı orınnıń ózinde ónimlerdi tekseriwden ótkeriw hám qısqa waqıt ishinde tiyisli laboratoriyalıq juwmaqlardı alıw, ósimlikler karantini, sonday-aq, haywanatlar karantini boyınsha da birge islesiwlerdi jolǵa qoyıw sıyaqlı máseleler atap ótildi.