Qaraqalpaqstan Respublikası máhálleni qollap-quwatlaw Keńesiniń shólkemlestiriw májilisi bolıp ótti

Májilisti Qaraqalpaqstan Respublikası Joqarǵı Keńesiniń Baslıǵı Amanbay Orınbaev ashtı hám alıp bardı. Ótkerilgen májiliste húrmetli Prezidentimizdıń 2023-jıl 21-dekabr kúngi «Máhálle institutınıń jámiyettegi ornın túpkilikli jaqsılaw hám onıń xalıqtıń mashqalaların sheshiwde birinshi buwın sıpatında islewin támiyinlewge qaratılǵan ilajlar haqqında»ǵı 209-sanlı pármanı hám de «Ózbekstan máhálleleri awqamı jumısın jolǵa qoyıw hám máhállelerde basqarıw sistemasın jetilistiriwge qaratılǵan qosımsha ilajlar haqqında»ǵı 402-sanlı qararı menen mámleketimizde máhálle institutı abıroyınıń jáne de artıwına itibar kúsheygenligi atap ótildi. Aytıp ótiw orınlı, usı párman hám qarar menen máhállelerdi qollap-quwatlawdı jáne de jedellestiriw, máhálle kesiminde islesiwge juwapker bolǵan shaxslardıń jumısın nátiyjeli shólkemlestiriw hám olardıń birge islesiwin támiyinlew jáne máhállelerdiń óz jumısın ámelge asırıwı ushın zárúrli sharayatlar jaratıw, olarǵa nızamda belgilengen wákilliklerin ámelge asırıwına kómeklesiwge qaratılǵan is-ilajları belgilep berildi. Usı tiykarda Qaraqalpaqstan Respublikası, wálayatlar hám Tashkent qalası, sonday-aq rayon hám qalalarda Máhálleni qollap-quwatlaw keńeslerin shólkemlestiriw hám Ózbekstan Respublikası Bas ministri, Qaraqalpaqstan Respublikası Joqarǵı Keńesiniń Baslıǵı, wálayatlar hám Tashkent qalası, rayon hám qala hákimlerine tiyisli tártipte respublika keńesi, aymaqlıq keńeslerge jámiyetshilik tiykarında basshılıq etiw belgilendi. Ótkerilgen shólkemlestiriw májilisinde rayon (qala)lardan delegat sıpatında saylanıp kelgen 68 máhálle puqaralar jıyınlarınıń baslıqları, sonday-aq, birge islesiwshi shólkemlerden wákiller hámde ǵalaba xabar quralları wákilleri qatnastı.

Qaraqalpaqstan Respublikası Joqarǵı Keńesiniń Málimleme xızmeti