Usı jıldıń 10-yanvar kúni húrmetli Prezidentimiz Shavkat Mirziyoev basshılıǵında 2024-jılda Qaraqalpaqstan Respublikasın sociallıq-ekonomikalıq rawajlandırıw baǵdarındaǵı jumıslardıń analizi hám kelesi wazıypalardıń dodalanıwı boyınsha májilis bolıp ótti

Onda Joqarǵı Keńes Baslıǵı 2024-jılda Qaraqalpaqstanda ámelge asırılıwı rejelestirilgen joybarlar prezentaciyası menen tanıstırdı. Atap ótiw kerek, respublikamızda 120 mıń jańa jumıs ornın jaratıw belgilengen bolsa, sonnan, 65 mıń jumıs ornın awıl xojalıǵı tarawında jaratıw rejelestirilmekte. Ayrıqsha tilge alıw orınlı, húrmetli Prezidentimiz tárepinen isbilermenlikti rawajlandırıw hám Qaraqalpaqstanda investiciyalıq tartımlılıqtı arttırıw, usı tiykarda jańa jumıs orınların jaratıw baǵdarında tariyxıy pármanlar qabıl etilgen edi. 2024-jılda Prezidentimiz tapsırması menen awıl xojalıǵı tarawı boyınsha da Qaraqalpaqstanǵa ayrıqsha jeńillik beriw máselesinde jáne bir áhmiyetli qarar joybarın islep shıǵıw tapsırması berildi hám burın bolmaǵan jeńillikler jaratılıwı kútilmekte. Bunnan tısqarı, IT tarawı, turizm tarawı boyınsha da jańa qarar joybarları islep shıǵılıwı hám bir qatar jeńillikler beriliwi kútilip atır.

Qaraqalpaqstan Respublikası Joqarǵı Keńesiniń Málimleme xızmeti