Ózbekstanda jaslardıń biznes penen shuǵıllanıwına qosımsha imkaniyat jaratıladı

Ózbekstanda jaslar arasında isbilermenlikti keńnen ǵalabalastırıw hám biznes penen shuǵıllanıwına qosımsha imkaniyatlar jaratıladı. Bul haqqında «Ózbekstan – 2030» strategiyasın «Jaslar hám biznesti qollap-quwatlaw jılı»nda ámelge asırıwǵa tiyisli mámleketlik baǵdarlaması haqqında»ǵı Prezident pármanında belgilendi. Pármanǵa tiykar, shańaraqlıq isbilermenlik baǵdarlaması sheńberinde ajıratılıp atırǵan kreditlerdiń keminde 40 payzı jaslar isbilermenligin rawajlandırıwǵa baǵdarlanadı. 2024-jıl 1-iyunnan baslap «Jas isbilermen» tańlawların ótkeriw ámeliyatı jolǵa qoyıladı. Bunda Jaslar isleri agentligi tárepinen tańlaw tiykarında máhálle – rayon – wálayat – respublika basqıshlarında jaslardıń perspektivalı biznes joybar hám ideyaları saylap alınadı. Mayıplıǵı bolǵan jas isbilermenlerdiń joybar hám ideyalarına ayrıqsha itibar qaratıladı. Respublika basqıshında saylap alıwdan ótken hár bir joybarǵa BEMnıń mıń esesine shekem (340 million sumǵa shekem) muǵdardaǵı jeńilletilgen kreditler ajıratıladı. Jeńimpaz bolǵan biznes joybar hám ideyalar iyeleri Jas isbilermenlerdi qollap-quwatlaw fondı esabınan sırt mámleketlerge tájiriybe arttırıwǵa jiberiledi.