Shımbay rayonındaǵı «Páshentaw» awılı abat mánzillerdiń birine aylanadı

Húrmetli Prezidentimizdiń basshılıǵında puqaralarımızdıń kúndelikli turmısında ushırasıp atırǵan mashqalalardı sheshiw, ámelge asırılıp atırǵan reformalardıń hár bir shańaraqqa kirip barıwın támiyinlew, máhállelerdi hár tárepleme abat etiw hám eń shetki aymaqlardı da payızlı máhállelerge aylandırıw boyınsha keń kólemli jumıslar alıp barılmaqta. Qaraqalpaqstan Respublikası Joqarǵı Keńesiniń Baslıǵı Amanbay Orınbaev Shımbay rayonınıń alıs hám awır aymaqlarınıń biri bolǵan «Páshentaw» awıl puqaralar jıyını puqaraları menen ushırastı. Awıl turǵınları menen ushırasıwda Páshentawda keń kólemli abadanlastırıw, puqaralardıń abadan turmısın támiyinlew baǵdarındaǵı ámeliy jumıslar alıp barılatuǵınlıǵı, bunıń ushın tiyisli qarjılar ajıratılıp, barlıq zárúr ilajlar kóriletuǵınlıǵı atap ótildi. Joqarǵı Keńes Baslıǵı aymaq ushın rejelestirilgen barlıq qurılıs jumıslarınıń óz waqtında, sapalı alıp barılıwı turaqlı túrde qadaǵalawda bolatuǵının atap ótti. Sonıń menen birge, taraw basshılarına tiyisli tapsırmalar berilip, awıl xalqı turmısın jaqsılaw, olardıń búgingi turmısınan razı etiw, «Abat awıl, abat kóshe, abat úy» principi tiykarında barlıq jumıslardı shólkemleskenlik penen alıp barıw kerekligi ayrıqsha sóz etildi.

Qaraqalpaqstan Respublikası Joqarǵı Keńesiniń Málimleme xızmeti