Hayal-qızlar – baxıtlı turmısımızdıń jaratıwshıları

Qaraqalpaqstan Respublikası Joqarǵı Keńesiniń baslaması menen házirgi waqıtta orınlarda «8-mart – Xalıqaralıq hayal-qızlar kúni» bayramı múnásibeti menen ótkerilip atırǵan hár qıylı ruwxıy-aǵartıwshılıq, mádeniy ilajlar dawam etpekte. Berdaq atındaǵı Qaraqalpaq mámleketlik akademiyalıq muzıkalı teatrında qala hám rayonlardaǵı kóshe biyi hayalları qatnasıwında teatrlastırılǵan saz-sáwbetli mádeniy ilaj shólkemlestirildi. Onda Qaraqalpaqstan Respublikası Joqarǵı Keńesi Baslıǵınıń orınbasarı R.Saparbaev shıǵıp sóylep, jıynalǵanlardı Qaraqalpaqstan Respublikası Joqarǵı Keńesi hám Ministrler Keńesi atınan qızǵın qutlıqladı. Bunnan soń, máhállelerde shańaraqlardıń tınıshlıǵın hám tatıwlıǵın saqlaw, ósip kiyatırǵan jas áwladtı ana-Watanımızǵa sadıqlıq ruwxında tárbiyalaw, awızbirshilik, tatıwlıqtı bekkemlewde múnásip úles qosıp kiyatırǵan bir qatar kóshe biyi hayallarına Joqarǵı Keńestiń kókirek belgisi hám estelik sawǵaları tapsırıldı. Ótkerilgen ilajda atap ótilgenindey, búgingi kúnde hayal-qızlarımız mámleketlik hám jámiyetlik basqarıwda, ilim, bilimlendiriw, mádeniyat, sport, isbilermenlik, ónermentshilik, mámleketlik siyasat, ulıwma barlıq tarawlarda múnásip orın iyelep, úlken jetiskenliklerge erispekte. Bul óz náwbetinde ósip kiyatırǵan qızlarımızdıń ozıq oylı, nawqıran áwlad bolıp kamalǵa keliwinde unamlı tásirin tiygizip, haqıyqıy úlgi bolıp atır. Búgingi ótkerilgen ilaj teatr aktyorları hám kórkem óner sheberleriniń atqarıwındaǵı saxnalıq kórinisler hám koncert baǵdarlaması menen dawam etti.

Qaraqalpaqstan Respublikası Joqarǵı Keńesiniń Málimleme xızmeti