Joqarǵı Keńes Baslıǵı Jáhán banki wákilleri menen ushırastı

Qaraqalpaqstan Respublikası Joqarǵı Keńesiniń Baslıǵı Amanbay Orınbaev Jáhán bankiniń Ózbekstan Respublikasındaǵı wákilleri Per Gerber, Preslava Nenova hám Alban Bellingezlerdi qabılladı. Ushırasıwda Qaraqalpaqstan Respublikasında sharwashılıq tarawın rawajlandırıw maqsetinde Jáhán bankiniń grant qarjıların ajıratıw máseleleri dodalandı. Atap aytqanda, bıyıl Qaraqalpaqstan Respublikası ushın 5 million AQSh dolları muǵdarında grant qarjıları ajratılıwı belgilep alınıp, noyabr-dekabr aylarında usı qarjılar esabınan qaramallardıń násilin jaqsılaw maqsetinde embrion islep shıǵaratuǵın laboratoriyalıq ásbap-úskeneler alınıp, haywanlardı identifikaciyalaw ushın 110 dana planshet, 18 dana kompyuter, sharwa haywanların identifikaciyalaw ushın 3 million 282 mıńnan artıq birkalar menen támiyinlenedi. Sonday-aq, Veterinariya hám sharwashılıqtı rawajladırıw komitetiniń materiallıq-texnikalıq bazası bekkemlenip, veterinariyalıq servis xızmetin jaqsılaw maqsetinde 2 dana arnawlı dezinfekciyalıq avtomobil, 5 tonnalıq – 1 dana, 1 tonnalıq – 13 dana muzlatqıshlı kamera hám 53 dana muzlatqısh, 16 dana kompyuter hám 16 dana printer menen támiyinlew belgilenbekte. Ushırasıwda sharwashılıq tarawın rawajlandırıw maqsetinde Jáhán banki tárepinen 2,8 milliard sum muǵdarında kredit qarjıları ajıratılǵanlıǵı atap ótilip, sonıń menen birge, 44 milliard sumlıq kreditler de ajıratılıwı jobalastırılǵanlıǵı haqqında maǵlıwmat berildi.