Respublika ilimiy-ámeliy medicinalıq konferenciyası ótkerildi

Búgin Nókis qalasındaǵı Aqquw kompleksinde jaylasqan qara úyde «Qızılónesh hám asqazan rak keselliginiń zamanagóy diagnostikası hám emlew» atamasında respublika ilimiy-ámeliy medicinalıq konferenciyası hám medicina ilimleriniń doktorı, professor, xirurg-shıpaker Mels Qabulovtıń 80 jıllıq yubileyi ótkerildi. Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev qatnastı. Atap ótilgenindey, sońǵı jılları húrmetli Prezidentimiz basshılıǵında densawlıqtı saqlaw tarawında keń kólemli reformalar ámelge asırılmaqta. Ásirese, taraw jumısları menen baylanıslı bir qatar párman hám qararlardıń qabıl etiliwi túpkilikli ózgerisler menen jańalanıwlarǵa bekkem tiykar bolıp xızmet etpekte. Ilimpazlardıń tınımsız izleniwleri nátiyjesinde hár jılı jańadan-jańa emlew usılları oylap tabılıp, jańa dáriler islep shıǵarılmaqta hám emlew processlerinde kóplegen jańa innovaciyalıq jańalıqlar qollanılmaqta. Bul baǵdarda respublikamız densawlıqtı saqlaw tarawında kóp jıllıq tájiriybege iye ádiwli ustaz, medicina ilimleriniń doktorı, professor, xirurg-shıpaker Mels Qabulovtıń miynetleri ayrıqsha. Onıń miynetleri menen bir qatarda, ol tayarlaǵan shákirtler búgingi kúnde medicina tarawına nátiyjeli jumıs alıp barıp atır. Búgingi ótkerilgen koncerenciya hám yubiley sánesinde Joqarǵı Keńes Baslıǵı barlıq ilimpazlarǵa xalqımız salamatlıǵın saqlaw jolındaǵı mashaqatlı jumıslarında tabıslar tiledi.