Joqarǵı Keńes komitetiniń májilisi ótkerildi

Qaraqalpaqstan Respublikası Joqarǵı Keńesiniń Sociallıq-mádeniy rawajlanıw, jaslar siyasatı, turizm hám jámiyetlik birlespeler máseleleri komitetiniń májilisi ótkerildi. Májilisti komitet baslıǵı M.Atamuratov ashtı hám alıp bardı. Kún tártibinde dáslep Qaraqalpaqstan Respublikası Joqarǵı Keńesiniń Sociallıq-mádeniy rawajlanıw, jaslar siyasatı, turizm hám jámiyetlik birlespeler máseleleri komiteti baslıǵınıń orınbasarın saylaw máselesi qarap shıǵıldı hám bul lawazımǵa 21-sanlı “Ámirabad” saylaw okruginen Bayrieva Almagul Kurbanovna saylandı. Sonday-aq, komitet xatkeri etip 3-sanlı «Medicina» saylaw okruginen deputat Li Marina Vladimirovna saylandı. Bunnan soń, Sociallıq-mádeniy rawajlanıw, jaslar siyasatı, turizm hám jámiyetlik birlespeler máseleleri komitetiniń 2025-jıldıń birinshi yarım jıllıǵında ámelge asıratuǵın ilajlardıń is rejesin islep shıǵıw haqqındaǵı másele qarap shıǵıldı. Májilis dawamında xalıqtıń salamatlıǵın bekkemlew, medicina mákemelerin qáwipsiz hám sapalı dári-dármaqlar, medicinalıq buyımlar menen támiyinlew, tarawǵa sanlastırıwdı engiziw boyınsha alıp barılıp atırǵan ilajlar haqqında Qaraqalpaqstan Respublikası Densawlıqtı saqlaw ministriniń esabatı tuwralı másele sın kóz-qarasta kórip shıǵıldı. Deputatlar tárepinen sorawlar berilip, áhmiyetli máseleler kóterildi. Májilis juwmaǵında qarap shıǵılǵan máselelerdi Qaraqalpaqstan Respublikası Joqarǵı Keńesiniń gezektegi sessiyası kún tártibine usınıw boyınsha tiyisli tártipte qararlar qabıl etildi.

Qaraqalpaqstan Respublikası Joqarǵı Keńesiniń Málimleme xızmeti