Ayırım awıl xojalıǵı texnikaları bajıxana bajısı hám utilizaciya jıyımınan azat etiledi

«Awıl xojalıǵın modernizaciyalaw dárejesin jáne de arttırıw ilajları haqqında»ǵı Prezident qararı qabıl etildi. Qararǵa muwapıq, 2025-jıl 1-yanvardan, awıl xojalıǵı texnikaların jetkerip beriwde ámeldegi nızamshılıqqa muwapıq qollanılatuǵın jeńillikler (subsidiya, salıq hám bajıxana jeńillikleri hám qarjılay járdemler) tek jergilikli islep shıǵarıwshılar hám dilerler arqalı qatnasıqqa shıǵarılatuǵın awıl xojalıǵı texnikalarına engiziledi. 2027-jıl 1-yanvarǵa shekem tómendegiler bajıxana bajısınan hám utilizaciya jıyımınan azat etiledi: – belgilengen talaplarǵa juwap beretuǵın paxta teriw kombaynları, ózi júretuǵın ot-jem jıynawshı hám baǵshılıq kombaynları, nál kómiw hám ashıw texnikaları; – jergilikli islep shıǵarıwshılar hám dilerlik xızmeti tárepinen sırt elden alıp kelinetuǵın jańa paxta teriw kombaynları, ózi júretuǵın ot-jem jıynawshı hám baǵshılıq kombaynları, nál kómiw hám ashıw texnikaları; 2025-jıl 1-marttan jeńilliklerden paydalanǵan halda satıp alınǵan, sonıń ishinde, respublikada islep shıǵarılǵan hám import etilgen jańa traktorlar hám kombaynlardı olarǵa qurılmasın ornatpaǵan halda mámleketlik dizimnen ótkeriw hám olardan paydalanıw qadaǵan etiledi. 2028-jıl 1-yanvardan baslap tiykarǵı paxta hám ǵálle ónimi ushın paxta hám biyday egiwde anıq danalap ekpeytuǵın seyalkalardan paydalanıw qadaǵan etiledi. Qararǵa muwapıq, awıl xojalıǵı texnikalarına xızmet kórsetiwshi isbilermenlerdiń buyırtpası (talabı) boyınsha xalıqtıń bántligine járdem beriw orayları instrukciyasına tiykarlanıp jumıssız jaslardı zamanagóy awıl xojalıǵı texnikalarına xızmet kórsetiwshi qánige sıpatında hám bul texnikalardı basqarıwshı operatorlıqqa (traktorshı-mashinist) oqıtıw hám qayta tayarlaw qárejetleri Bántlikke járdem beriw mámleketlik qorı esabınan qaplap beriledi. 2025-jıl 1-yanvardan 2028-jıl 1-yanvarǵa shekem awıl xojalıǵı texnikaların ońlaw, agrotexnikalıq xızmetler kórsetiw, sonıń ishinde, egislik maydanların lazerli jer tegislegish járdeminde tegislew, paxtanı shırpıw (chekanka) hám defoliaciyalaw xızmetlerin kórsetiwshi isbilermenlerge (buǵan klasterler kirmeydi) yuridikalıq táreplerden alınatuǵın jer salıǵı hám yuridikalıq táreplerdiń múlkine salınatuǵın salıq stavkaları 50 procentke azaytıladı. Awıl xojalıǵı texnikaların islep shıǵarıwshı jergilikli kárxanalar tárepinen óz mútájligi ushın ornatılǵan tártipte qáliplestiriletuǵın dizim boyınsha sırt elden alıp kelinetuǵın awıl xojalǵı texnikalarınıń komplektlewshi hám awısıq bólekleri 2028-jıl 1-yanvarǵa shekem bajıxana bajısınan azat etiledi.