Qońırat temir jol vokzalınıń jańa imaratı paydalanıwǵa tapsırıldı

Búgin Qońırat temir jol vokzalınıń rekonstrukciyadan shıqqan jańa imaratınıń paydalanıwǵa tapsırılıwına arnalǵan saltanatlı ilaj ótkerildi. Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, kirip kiyatırǵan Jańa jıl bayramı, sonday-aq, bayram qarsańında jańa imarattıń paydalanıwǵa tapsırılıwı múnásibeti menen jıynalǵanlardı qutlıqladı. Atap ótilgenindey, sońǵı jılları húrmetli Prezidentimizdiń basshılıǵında elimiz ekonomikasınıń barlıq tarawlarında hám xalqımızdıń turmısında tariyxıy ózgerisler menen jańalanıwlar júz bermekte. Barlıq tarawlar qatarında Transport tarawında alıp barılıp atırǵan reformalar xalqımızdıń uzaǵın jaqın, awırın jeńil etip atır. Búgingi paydalanıwǵa tapsırılıp atırǵan Qońırat temir jol vokzalınıń jańa imaratında Prezidentimizdiń arnawlı tapsırması menen 17,5 mlrd. swmlıq rekonstrukciya jumısları alıp barıldı hám barlıq qolaylı sharayatlar jaratıldı. Sonı da ayrıqsha aytıp ѳtiwimiz kerek, bul obektte ѳtken 70 jıl ishinde bunday keń kѳlemli kurılıs-rekonstrukciya jumısları ámelge asırılmaǵan edi. Albette, bul temir jol vokzalı uzaq jıllar dawamında xalqımızǵa hámde elimizge kelgen miymanlarımızǵa sapalı xızmet etedi.