Jańa tuwılǵan balalar ushın depozitler ashıw baslaması alǵa qoyılmaqta
1114
Bas nızamımızda Ózbekstan sociallıq mámleket ekenligi qatań belgilep qoyıldı. Bul principtiń ámeldegi orınlanıwı sheńberinde bir qatar ilajlar ámelge asırılmaqta. Sonıń ishinde, sociallıq qorǵaw máselelerin áhmiyetli wazıypa sıpatında belgilep alǵan Ózbekstan Xalıq demokratiyalıq partiyası shólkemleri hám deputatlıq birlespeleri de bul baǵdarda bir qatar baslamalardı alǵa qoymaqta. Qaraqalpaqstan Respublikası Joqarǵı Keńesindegi Ózbekstan Xalıq demokratiyalıq partiyası frakciyası barlıq jańa tuwılǵan balalar ushın balalar depozitin ashıw boyınsha joybar islep shıǵıp, frakciya májilisinde dodaladı. Sociallıq mámleket statusın bekkemlew baǵdarındaǵı is-háreketler sheńberinde jańa tuwılǵan balanı tárbiyalawda ata-analardı qollap-quwatlaw ilajların kúsheytiw maqsetke muwapıq. Bunıń ushın qosımsha imkaniyatlar jaratıw hám olardı balalarǵa uzaq múddetli investiciya kirgiziwge jánede belsene tartıwdı xoshametlewshi ilajlardı izlep tabıw zárúr. Usı maqsette Qaraqalpaqstan Respublikası Joqarǵı Keńesi Baslıǵınıń orınbasarı Rustam Saparbaev tárepinen islep shıǵılǵan "Barlıq jańa tuwılǵan balalar ushın balalar depozitin ashıw boyınsha joybar" úlken áhmiyetke iye.
Egerde, bul joybar mámleket tárepinen qollap-quwatlansa hám dáslepki qarjı ajıratıw ilajları kórilse bunda bala er jetkende shaxs sıpatında qáliplesiwi, qábiletin rawajlandırıw ushın erkin finanslıq resurslarǵa ie bolıwın támiyinlewge múmkinshilik jaratıladı. Barlıq jańa tuwılǵan balalar ushın «balalar depozitin» ashıw, bul depozitti ata-analar, ámengerler yamasa basqa da qáwenderler tárepinen nızam tiykarında basqıshpa-basqısh toltırıw imkaniyatın támiyinlew hám 18 jasqa tolǵanda, toplanǵan qarjılardı procentleri menen alıw huqıqın beredi.
Sonday-aq, xalıqtıń uzaq múddetli investiciyalıq pikirin basqıshpa-basqısh qáliplestiredi. Bul bolsa mámleketten járdem qarjıların talap etiw hám sociallıq járdemge baylanıslılıq sezimin azaytadı. Óz gezeginde, xalıqtıń fondların jáne de investiciyalaw hám kapitaldı ósiw esabınan onı kóbeytiwge beyimlikti arttıradı. Áhmiyetlisi, basqıshpa-basqısh ámelge asırılatuǵın ózgerisler "óli pul" kórinisindegi qorlardıń kólemin qısqartıwǵa xızmet etedi. Joybarǵa bola, "balalar depozitiniń" iyesi keleshekte er jetken miynetke jaramlı balalardıń ata-analarına ǵamxorlıq etiw ushın konstituciyalıq minnetlemelerin orınlaw imkaniyatı jaratıladı. Nátiyjede mámlekettiń "sociallıq mámleket" sıpatındaǵı imidji artadı. Bunnan tısqarı, uzaq múddette mámlekettiń qosımsha byudjet qárejetleri kórinisindegi mámlekettiń sociallıq júgi kemeyedi. "Balalar depozitiniń" iyesi 18 jasqa tolǵannan keyin bilim alıwdı dawam ettiriw, turaq jay hám turmıslıq máselelerdi sheshiw, toplanǵan qarjılardı keyin ala investiciyalaw yamasa olardan basqa da jeke nızamlı maqsetler ushın paydalanıw sıyaqlı zárúrlikleri ushın bos finanslıq resurslarǵa iye boladı. Májiliste qatnasıwshılar joybar boyınsha óz pikir-usınısların bildirip, Ózbekstan Xalıq demokratiyalıq partiyası baǵdarlamasına sáykes ekeni, partiya elektoratı máplerine xızmet etetuǵının atap ótti. Máseleni sessiya dodalawına alıp shıǵıw boyınsha wazıypalar belgilep alındı.