Ózbekstan Prezidenti rásmiy sapar menen Birlesken Arab Ámirliklerinde boladı
867
Ózbekstan Respublikası Prezidenti Shavkat Mirziyoev Birlesken Arab Ámirlikleri Prezidenti Shayx Muhammad bin Zoid Ol Nahayannıń mirát etiwine bola 13-16-yanvar kúnleri rásmiy sapar menen usı mámlekette boladı. Sapar sheńberinde Abu-Dabi hám Dubay qalalarında ushırasıwlar hám ilajlar ótkeriliwi názerde tutılǵan. Mámleketimiz basshısı Ámirlikler paytaxtında Prezident Shayx Muhammad bin Zoid Ol Nahayon menen eki tárepleme sóylesiwler ótkeredi, mámlekettiń jetekshi mámleketlik shólkemleri, kompaniya hám bankleriniń basshıları menen ushırasadı, sonday-aq, "Abu-Dabi turaqlı rawajlanıw hápteligi" xalıqaralıq sammitinde qatnasadı. Dubay qalasında Birlesken Arab Ámirlikleri vice-prezidenti, Bas ministri, Dubay Ámiri Shayx Muhammad bin Roshid Ol Maktum menen ushırasıw ótkeriliwi rejelestirilgen. Sapar kún tártibinen Ózbekstan-BAÁ doslıq hám kóp qırlı sheriklik qatnasıqların bunnan bılay da bekkemlew, investiciyalar, "jasıl" energetika, infrastruktura, sanlastırıw, jasalma intellekt, innovaciyalıq rawajlanıw, turizm hám basqa da kóplegen tiykarǵı baǵdarlarda ámeliy birge islesiwdi keńeytiw máseleleri orın alǵan. Mádeniy-gumanitarlıq almasıwdı jedellestiriwge ayrıqsha itibar qaratıladı. Xalıqaralıq hám regionallıq siyasattıń áhmiyetli tárepleri de kórip shıǵıladı. Joqarı dárejedegi sóylesiwlerdiń juwmaǵında eki mámleket arasındaǵı keń kólemli birge islesiwdi bunnan bılay da rawajlandırıwǵa qaratılǵan salmaqlı kelisimler toplamınıń qabıl etiliwi kútilmekte.