Ayırım isbilermen hám yuridikalıq shaxslar mámleketlik bajını tólewden azat etiledi
786
Prezident tárepinen qol qoyılǵan Nızam menen "Mámleketlik bajı haqqında"ǵı Nızamǵa qosımshalar hám ózgerisler kirgizildi. (https://lex.uz/ru/docs/4680944) "Mámleketlik bajı haqqında"ǵı Nızamǵa kirgizilgen qosımshaǵa muwapıq, hákimshilik-aymaqlıq birliklerdiń dúzilgeni yamasa saplastırılǵanı, olardıń shegaraları yamasa boysınıwı ózgertilgeni nátiyjesinde isbilermenlik subektleri hám basqa da yuridikalıq shaxslardıń jaylasıw ornı (pochta mánzili) ózgergende olar qayta mámleketlik dizimnen ótkergeni ushın mámleketlik bajını tólewden azat etiledi. Sonday-aq, qamsızlandırıwshılar májbúriy qamsızlandırıw shártnamalarınan kelip shıǵatuǵın dawagerlik boyınsha mámleketlik bajını tólewden azat etiliwin názerde tutatuǵın qosımshalar kirgizilmekte. Bunda qamsızlandırıwshılar (qamsızlandırılǵan shaxslar, paydalanıwshılar, jábirleniwshiler) májbúriy qamsızlandırıw shártnamalarınan kelip shıǵatuǵın dawagerlik boyınsha Puqaralıq isleri boyınsha sudlarda hám Ekonomikalıq sudlarda mámleketlik bajını tólewden azat etiledi. Nızam rásmiy járiyalanǵan kúnnen baslap kúshke kiredi.