Respublika isshi toparı tárepinen Beruniy rayonında kóshpeli qabıllaw ótkerildi

Húrmetli Prezidentimizdiń tapsırması menen Qaraqalpaqstan Respublikasında puqaralardıń mashqalaların úyreniw hám sheshimin tabıw boyınsha respublikalıq isshi topar dúzilip, bul baǵdarda orınlarda kóshpeli qabıllawlardı shólkemlestiriw boyınsha wazıypalar belgilengen edi. Búgin Beruniy rayonında Ámiwdárya, Beruniy, Tórtkúl hám Ellikqala rayonlarınan kelgen puqaralar ushın respublikalıq sektor jáne ministrlikler hám shólkemlerdiń basshıları tárepinen múrájatlar hám xalıqtı qıynap kiyatırǵan mashqalalarǵa sheshim tabıw boyınsha kóshpeli qabıllaw ótkerildi. Onda Ózbekstan Respublikası Joqarı sudı, Bas prokuratura, Ishki isler ministrligi, Ádillik ministrligi, Densawlıqtı saqlaw ministrligi, Qurılıs hám úy jay kommunal xojalıǵı ministrligi, Oraylıq bank, Bajıxana basqarması, Salıq komiteti, Kadastr agentligi hám basqa da mákemelerdiń basshıları qatnastı. Ótkerilgen qabıllawda sud-huqıq sistemasına baylanıslı múrájatlar, medicinalıq járdemler kórsetiw, sociallıq qollap-quwatlaw, bilimlendiriw, bántlik, máhállelerdegi infrastruktura, bank kreditleri hám basqa da bir qatar máseleler boyınsha múrájatlar bildirildi. Aytıp ótiw orınlı, qabıllawda puqaralar tárepinen bildirilgen múrájatlarǵa ornında sheshimin tabıw ilajları kórildi. Waqıt talap etiletuǵın múrájatlar qadaǵalawǵa alınıp, tez pursatta unamlı sheshiw boyınsha tiyisli ilajlar kóriw belgilendi.