Medicina tarawında ámelge asırılǵan jumıslar sın kóz-qarasta qarap shıǵıldı

Qaraqalpaqstan Respublikası Joqarǵı Keńesiniń komitet baslıǵı M.Atamuratov medicina tarawında alıp barılıp atırǵan jumıslarǵa arnalǵan májilis ótkerdi. Májiliste Densawlıqtı saqlaw ministrligi adminstraciyası, barlıq medicina mákemeleri basshıları hám juwapkerler qatnastı. Onda dáslep, elimizde medicina tarawın rawajlandırıw baǵdarında ámelge asırılıp atırǵan jumıslar, bul baǵdarda qabıl etilip atırǵan qarar hám pármanlar, taraw mákemeleriniń materiallıq-texnikalıq bazasın bekkemlew ilajlarına ken túrde toqtalıp ótildi. Ayrıqsha aytıw orınlı, Prezidentimiz tárepinen ilgeri súrilgen kóplegen ideyalar búgin turmıs haqıyqatlıǵına aylanıp barmaqta. Atap aytqanda húrmetli Prezidentimizdiń «Tashkentte bar barlıq zamanagóy medicinalıq xızmetler Nókiste de jolǵa qoyıladı» degen sѳzleri búgin ámelde ѳz tastıyıǵın tawıp atır. Májiliste usınshama imkaniyatlar jaratılıwına qaramastan, medicina mákemelerin joqarı maǵlıwmatlı maman kadrlar menen támiyinlew, analar hám balalardıń densawlıǵın saqlaw hám ólimshiliktiń aldın alıw, onkologiyalıq keselliklerdi erte basqıshta anıqlaw jumıslarındaǵı kemshilikler ushırasıp atırǵanlıǵına ayrıqsha toqtap ótildi. Sonıń menen birge, ayırım shıpakerler tárepinen óz mápi ushın nawqaslarǵa qımbat bahadaǵı dári-darmaqlardı usınıw, medicina mákemelerinde sanitariyalıq jaǵdaylar menen baylanıslı kemshilikler anıqlanǵanı, sonday-aq, tarawda korrupciyalıq jaǵdaylardıń ele dawam etip atırǵanlıǵı, túrli jınayıy háreketler júz bergeni, byudjet qarjıların talan-taraj etiw jaǵdayları bar ekenligi qatań sınǵa alındı. Májilis dawamında óz wazıypasın orınlawda nemquraydılıq penen qaraǵan hám qáte-kemshiliklerge jol qoyǵan taraw basshılarına qatań jaza sharaların qollaw boyınsha tapsırma berildi.