Júreklerdi tebirendirgen qos quwanısh
2642
Biyǵam balalıqtıń quwanısh, oyın-kúlkisine hesh nárse jetpeydi. Elimizde bayramlarǵa sıylı sawǵalar menen keliw ádetiy túske aylanǵan.
Úsh ay burın, Qanlıkól rayonı orayına kire beristegi bos jatırǵan ashıq maydanǵa eń zamanagóy arxitekturalıq úlgidegi mıń orınlıq stadion salınıp, xalıqaralıq Balalardı qorǵaw kúni bayramı húrmetine paydalanıwǵa berilgenine jas óspirimler sheksiz quwanıshqa bólendi. Respublikamızdıń kópshilik rayonları oraylarına usınday qurılıs-smetalıq nırqı 6 mlrd. sumlıq stadionlardı qısqa waqıt ishinde sapalı qurıp pitkeriwde juwapkershiligi sheklengen «Baxıt-Miratdin» qurılıs shólkeminiń baslıǵı Baxıt Salatdinov basqarǵan jámááttiń miynetleri ayrıqsha.
Qanlıkól rayonınıń sportshıları Qaraqalpaqstan hám Ózbekstan Respublikaları kóleminde ótkerilip kiyatırǵan chempionat hám kuboklar jarıslarında jetekshi orınlardı iyelep kelmekte. Balalar hám jas óspirimler sport mektebinde joqarı hám orta mamanlıqtaǵı 26 trener 1417 jas óspirimdi ózleri qızıqqan sporttıń 13, atap aytqanda, 9 olimpiada sport túrleri menen turaqlı shuǵıllandırıp, olardıń arasınan chempionlar, joqarı razryadlı sportshılardı tárbiyalap shıǵarmaqta.
Jaz paslınıń jadıraǵan ashıq aspanlı bayram kúni, stadiondı paydalanıwǵa tapsırıw máresiminde Qaraqalpaqstan Respublikası Joqarǵı Keńesiniń Baslıǵı M.Erniyazov jıynalǵanlardı qos bayram, qos quwanıshları menen qutlıqlap, jas sportshılarǵa Prezidentimiz sawǵaların inam etti.
Qurılısshılar «Jayhun» dep at alǵan stadionnıń dástúriy «altın giltin» Balalar hám jas óspirimler sport mektebiniń direktorı B.Atabaevqa tapsırdı.
Bayram saltanatları baslanıp, jasalma kógis gazonda Qanlıkól hám Xojeli rayonlarınıń jas óspirimler, nuranıy futbolshılardıń joldaslıq ushırasıwları, baqsha balaları menen mektep oqıwshıları, rayon hám respublika kórkem óner ǵayratkerleriniń koncert baǵdarlamaları menen ulasıp ketti.