Húrmetli Prezidentimizdiń Qaraqalpaqstan Respublikasın kompleks rawajlandırıw, isbilermenlikti qollap-quwatlaw hám xalıqtıń abadan turmısın támiyinlew baǵdarındaǵı jáne bir óz aldına áhmiyetli pármanı qabıl etildi.

✅ Pármanǵa muwapıq, jańadan 3 mákeme shólkemlestirildi: 1. “Qaraqalpaqstan Respublikasında joybarlardı ámelge asırıw orayı” joybarlaw ofisi; 2. Qaraqalpaqstan Respublikası Ministrler Keńesi janında Isbilermenlikke kómeklesiw direkciyası; 3. Ministrler Keńesi strukturasında Sırtqı biyǵárez járdem qarjıların (grantlardı) tartıw hám donorlar menen islesiw bólimi. 1. “Qaraqalpaqstan Respublikasında joybarlardı ámelge asırıw orayı” joybarlaw ofisi Qaraqalpaqstan Respublikasınıń hár bir rayonı (qala)nıń ósiw noqatların anıqlaydı hám analizleydi. Sonıń menen birge: ➡ jer uchastkaları hám olarda jaylastırılatuǵın awıl xojalıǵı eginleri túrlerin anıqlaw, sonday-aq, usı jer uchastkalarınan alınatuǵın dáramatlardı kóbeytiw boyınsha zárúr is-ilajlardı islep shıǵadı; ➡ ónimlerdi tereń qayta islew tarawındaǵı investiciya joybarlarınıń mánzilli dizimlerin kelisedi hámde strategiyalıq investorlardı tartadı; ➡ aymaqtıń imkaniyatlarınan kelip shıǵıp, sanaat joybarlarınıń jaylastırılıwın muwapıqlastıradı hám kelisedi; ➡ turizmniń jańa hám potenciallı jónelislerinde bar bolǵan imkaniyatlardı iske saladı, 2. Qaraqalpaqstan Respublikası Ministrler Keńesi janında Isbilermenlikke kómeklesiw direkciyası Nókis qalası hám rayonlarda sanaat obektleri ushın imarat qurıw, olardı ijaraǵa beriw, satıw hám basqada áhmiyetli wazıypalardı ámelge asıradı. 3. Ministrler Keńesi strukturasında shólkemlestirilgen Sırtqı biyǵárez járdem qarjıların (grantlardı) tartıw hám donorlar menen islesiw bólimi grant joybarların tartıw maqsetindegi táreplerge jaqınnan járdem beredi. Bunnan tısqarı, usı párman menen bir qatar jeńillikler berildi. Atap aytqanda, Ministrler Keńesiniń qararı tiykarında 2025-2027-jıllarda Nókis qalasında keminde 500 mıń AQSh dolları, Ámiwdárya, Xojeli, Qońırat hám Nókis rayonları ushın 300 mıń AQSh dolları, sonday-aq qalǵan Ellikqala, Beruniy, Tórtkúl, Taqıyatas, Kegeyli, Bozataw, Shımbay, Qaraózek, Taxtakópir, Shomanay, Qanlıkól, Moynaq rayonları ushın 100 mıń AQSh dolları ekvivalentinde bolǵan iri investiciyalıq joybarlar ushın (sonıń ishinde, sırt el investiciyaları qatnasındaǵı kárxanalarǵa, erkin ekonomikalıq zonalar, kishi sanaat zonaları, jaslar sanaat hám isbilermenlik zonaları aymaqlarında) jer uchastkaların uzaq múddetli ijara huquqı menen beriw tártibi engiziledi. ✅ 2025-2026-jıllarda Qaraqalpaqstan Respublikasında sanaattı rawajlandırıw ushın tarmaqlarǵa ajıratılǵan qarjılar esabınan 100 mln AQSh dollar ajıratıldı. Bunda: - Nókis qalası, Ámiwdárya, Qanlıkól, Nókis, Qońırat hám Shımbay rayonlarında kishi sanaat zonaları shólkemlestirilip, barlıq qolaylıqlar hám infrastrukturaǵa iye bolǵan imaratlar qurıladı hám investorlarǵa usınıladı; - Kishi hám orta biznes joybarların qarjılandırıw ushın isbilermenlerge 10 milliard sumǵa shekem jeńilletilgen kredit beriledi, yaǵnıy, kreditler jıllıq 14 procent stavkada, 7 jılǵa shekemgi múddetke, sonıń ishinde, 2 jıllıq jeńilletilgen dáwir menen ajıratıladı. ✅ 2025-2026-jıllar dawamında awıl xojalıǵına arnalǵan jerlerdi ijaraǵa beriw tártibi jeńilletiledi, yaǵnıy: ➡ Múddetin keyin ala sozıw imkaniyatı menen ijara múddeti 30 jıldan 49 jılǵa uzaytıldı. ➡ 35 mıń gektar bos turǵan awıl xojalıǵına mólsherlengen jer uchastkaları elektron onlayn aukcion sawdalarına shıǵarıladı. - elektron onlayn aukcion sawdalarında jer uchastkasınıń baslanǵısh bahası jer uchastkasınıń normativlik bahasınıń 20 procenti muǵdarında, qayta paydalanıwǵa kirgiziletuǵın jer uchastkalarınıń baslanǵısh bahası normativlik bahasınıń 10 procenti muǵdarında belgilenedi; - jer uchastkasınıń bahasın 10 jıl dawamında bólip tólewge ruxsat beriledi. ➡ Elektron onlayn aukcion sawdaları arqalı ajıratılatuǵın awıl xojalıǵına mólsherlengen barlıq túrdegi jer uchastkaların ijaraǵa alıwshılar awıl xojalıǵı eginleriniń túrleri hám kólemlerin, sonday-aq, olardı jetistiriw hám agrotexnikalıq ilajlardı ótkeriw usılların biyǵárez jeke ózi belgileydi. ➡ Ijaraǵa beriletuǵın jer uchastkalarınıń shetlerinde, 20 sotixqa shekem ólshemde múlk huqıqısız jeńil konstrukciyalı muzlatqıshlı qoymaxanalar, sortlaw, qayta islew hám qadaqlaw obektleri, suwdı únemleytuǵın texnologiyalar, suw saqlaw háwizleri, dala shiyponları hám texnika parklerin qurıwǵa ruxsat etildi. ✅ Xalıqaralıq finans institutların tartqan halda joqarı qunlı awıl xojalıǵı ónimlerin jetistiriw kólemin arttırıw hám jańa jumıs orınların jaratıw maqsetinde Bozataw hám Taxtakópir rayonlarında paydalanılmay bos turǵan sharwashılıq komplekslerinde iri hám mayda shaqlı qaramallardı baǵıwdı jolǵa qoyıw ushın azıqlıq eginlerin jetistiriwge rezerv jerlerden awıl xojalıǵına mólsherlengen jer uchastkaları elektron onlayn aukcion sawdalarına shıǵarıladı. ✅ 2025-jılda qurǵaqshılıqqa shıdamlı eginlerdi jaylastırıw kólemi arttırıladı, awıl xojalıǵı ónimlerin islep shıǵarıwshılar zamanagóy agrotexnologiyalarǵa ámeliy oqıtıladı, sonıń ishinde, usı texnologiyalardı qollanǵan halda 10 rayonda 2-3 eginge qánigelesken úlgili egislik maydanlardıń jaratılıwı shólkemlestiriledi. ✅ 2025-jıldıń aqırına shekem aymaqta qosımsha gósh hám sút ónimlerin islep shıǵarıwdı rawajlandırıw maqsetinde iri qaramal, qoy hám eshkilerdi kóbeytiw ushın embrionlardı kóshirip ótkeriw texnologiyaları menen támiyinlengen 4 biotexnologiyalıq oray shólkemlestirilmekte. ✅ Usı jılı Xojeli rayonında sharwashılıq texnikalarına kompleks xızmet kórsetiwshi texnika-servis orayları jeke isbilermenlik subektleri tárepinen shólkemlestiriledi. Bunda: - "Wzagrolizing" AJ tárepinen 44 dana sharwashılıq texnikası 10 jıl múddetke jıllıq 14 payız stavkada baslanǵısh tólemi 15 payız etip, texnika-servis oraylarına lizing tiykarında beriledi. Baslanǵısh tólem bolsa, subsidiya esabınan qaplanadı; ✅ 2026-2027-jıllarda suwǵarıw tarmaqların rekonstrukciyalaw ushın xalıqaralıq finans institutları hám sırt el húkimetlik finans shólkemleriniń qarjıları ajıratıladı: ➡ Nókis rayonındaǵı Bozataw kanalınıń 46 kilometri; ➡Qaraózek rayonındaǵı Esimózek kanalınıń 69 kilometr bólegi rekonstrukciyalanadı. ✅ 2025-jıl juwmaǵına shekem Qaraqalpaqstan Respublikasına 5 zemsnaryad alıp kelinedi. Sonday-aq: ✅ “Tallıq” kanalınıń Qońırat hám Moynaq rayonlarındaǵı 106 kilometrge shekemgi bólegi 2026-2030-jıllarda rekonstrukciya qılınadı. ✅ Qaraqalpaqstan Respublikasında "A" viruslı gepatit keselliginiń aldın alıw ushın kesellikke qarsı vakcinaciyalaw Milliy profilaktikalıq shanshıw kalendarına kirgiziledi hám Ózbekstan Respublikası respublika byudjetinen zárúr qarjılar ajıratıladı. ✅ Paydalanılmay atırǵan mámleketlik sociallıq tarawdıń múlk obektleri investiciyalıq joybarlardı ámelge asırıw minnetlemesi menen elektron onlayn aukcion sawdalarına shıǵarıladı. ✅ Kommerciyalıq banklerdiń balansındaǵı múlk obektlerin bazar bahasında qayta bahalanıp, 10 jıl dawamında bólip-bólip tólew shárti menen elektron onlayn aukcion sawdalarına shıǵarıwǵa ruxsat beriledi.