Turizm tarawın rawajlandırıw máseleleri talqılandı

Qaraqalpaqstan Respublikası Joqarǵı Keńesiniń Baslıǵı Amanbay Orınbaev respublikamız aymaǵında turizm tarawında jumıs alıp barıp atırǵan isbilermenler menen ushırastı. Onda dáslep, húrmetli Prezidentimizdiń Qaraqalpaqstanǵa bolǵan ayrıqsha itibarı menen qabıl etilgen qarar hám pármanlar, usı tiykarda turizm tarawın rawajlandırıw, isbilermenlikti qollap-quwatlaw boyınsha jaratılǵan qosımsha imkaniyatlar, berilgen jeńillikler haqqında keń túrde sóz etildi. Atap ótilgenindey, ótken qısqa waqıt ishinde tarawdı rawajlandırıw boyınsha bir qatar áhmiyetli hújjetler qabıl etilip, bul óz gezeginde elimizde turizmdi rawajlandırıwdı jańa basqıshqa alıp shıǵıwǵa bekkem tiykar bolıp xızmet etpekte. Ótkerilgen ushırasıwda mine usınday bir qatar jaratıp berilgen imkaniyatlar haqqında pikirlesildi. Sonday-aq, tarawdı rawajlandırıw boyınsha jáne qanday ilajlardı ámelge asırıw kerekligi, isbilermenler aldında ushırasıp atırǵan mashqalalar, sheshimin kútip turǵan máseleler boyınsha taraw wákilleriniń pikir-usınısları tıńlandı. Óz náwbetinde turizm tarawında jumıs alıp barıp atırǵan isbilermenlik subektleri tárepinen áhmiyetli máseleler kóterildi. Ushırasıwda hár bir kóterilgen másele belgilep alınıp, sheshimin tabıw boyınsha Joqarǵı Keńes Baslıǵınıń jeke qadaǵalawına alındı.